Dreka e sotme Doshi-Tahiri, paqe apo luftë?

Të njohur për përplasjet e tyre verbale, Tom Doshi dhe Saimir Tahiri kanë zgjedhur këtë të shtunë që të ballafaqojnë direkt me njëri-tjetrit çështjet që kanë krijuar edhe këtë ndasi ndërmjet të dyve.

Doshi dhe Tahiri kanë drekuar sëbashku në Hotel Rogner, i cili gjendet jo më shumë se 20 metra larg godinës së Këshillit të Ministrave dhe jo më shumë se 30 metra larg godinës së Kuvendit.

Dy ditë para mbledhjes së grupit parlamentar socialist, ku pritet të diskutohet dhe qëndrimi publik i mbajtur nga Doshi në drejtim të qeverisë “Rama”,  tonet duken se ende nuk janë zbutur.

Mësohet se takimi është kërkuar nga zoti Doshi dhe ka qenë shumë i tensionuar.

Nga dëshmitarët që kanë qenë afër thuhet se takimi ka qenë mjaft i acaruar mes të dyve.

Tahiri i përket grupit të deputetëve që kërkojnë përjashtimin e tij. Ky grup është ende një shumicë e cilësuar brenda socialistëve.

Vetë Doshi pranon se është takuar me ministrin e kritikuar ashpër herë pas here prej tij, dhe saktëson se në qendër të bashkëbisedimit që ka zgjatur jo pak, ka qenë situata e kriminalitetit në zonën e Shkodrës.

Doshi nuk preferon të saktësojë nëse në qendër të shqetësimit të tij ka qenë kriminaliteti, apo emërimet në rrethin e drejtuesve të policisë.

Deputeti i zonës së Shkodrës Tom Doshi deklaroi se do të shkojë të hënën në mbledhjen e grupit të PS, ku siç përflitet prej ditësh mund edhe të përjashtohet nga grupi parlamentar i PS.

Për këtë Doshi komentoi duke thënë, se është herët të flasë dhe se duhet pritur vendimi.

Ndërkohë, deputeti Tom Doshi ka edhe një mesazh për kolegun e tij socialist Namik Kopliku, i cili  e kritikoi duke deklaruar se qëndimet e shprehura nga Doshi ngjajnë me ato të Berishës.

Për Tom Doshin këto qëndrime janë të detyruara nga kryeministri Edi Rama.

“Nuk më shqetësojnë deklarimet e Namik Koplikut, një njeri i cili në 2009-n mblidhte firma në Shkodër për shkarkimin e Edi Ramës si kryetar partie.  Kam qenë unë ai i cili e kam vendos emrin e Koplikut në listë për deputet”, thotë Doshi për TCH duke shtuar se nuk i bën përshtypje mosmirënjohja e Koplikut pasi ka të tjerë më të rëndësishëm në PS që nuk i janë mirënjohës.

Pas kthimit nga Bukureshti, pritet të zbardhet edhe qëndrimi që do të mbajë Kryeministri Rama ndaj deputetit “rebel“. Të enjten pati edhe një komunikim mjaft të acaruar në seancë plenare, aq sa detyroi deputetët e tjerë që të angazhoheshin për të mbyllur debatin, të paktën për momentin.