Dita Ndërkombëtare e Aftësisë së Kufizuar
Prej më se tre muajsh shteti po mban peng pagesat që u takojnë sipas ligjit personave me aftësi të kufizuara. Akuza është ngritur nga Këshilli Kombëtar i aftësisë së Kufizuar gjatë ditës së djeshme e cila përkonte me ditën ndërkombëtare të paaftësisë. Rrethe, si: Berati, Shkodra, Elbasani, Pogradeci, Peqini, si dhe komuna te tyre kanë lënë pa pagesa personat me aftësi të kufizuara prej 3 muajsh.
Kreu i këtij këshilli Sinan Tafaj, i ka bërë thirrje Qeverisë të marrë masat e të sigurojë pagesat e aftësisë së kufizuar, teksa ka kërkuar edhe futjen e tyre në skemë te pensioni jokontributiv. Kjo pasi problemet me të cilat përballet kjo shtresë janë të shumta, ku vetëm gjatë muajve të fundit nga mosmarrja e pagesës janë ushqyer me borxhe dhe lista.
“Shqetësimi i mosrealizimit të pagesave për shkak të aftësisë së kufizuar është i përhershëm dhe prej shumë vitesh, pasi buxheti i shtetit ka shtyrë në borxh nga viti në vit dy muajt e fundit, sidomos muajin dhjetor. Çelja e buxhetit nuk është bërë e plotë, por në një përqindje të caktuar,sipas Bashkive dhe komunave dhe në të vërtetë shumë nga njerëzit tanë nuk kanë marrë pagesën e verbërisë ose pagesën shoqëruese ka ardhur koha që shteti shqiptar duhet të fusë një skemë të re sociale, siç është pensioni jokontributiv, për ata të cilët nuk punojnë dot”, ka deklaruar Tafaj.
Vonesa të cilat nuk janë pranuar nga ministri i Punës, Spiro Ksera, i cili ka lëshuar batuta ndaj Avokatit të Popullit, institucion ky që ka kritikuar herë pas here Ministrinë e Kserës për mospërmbushjen e detyrimeve të saj.