Parlamenti Europian shfuqizon shërbimin “roaming”

Shfuqizimi i shërbimit “roaming” për përdorimin e internetit, telefonave apo mesazheve brenda shteteve të Unionit, u miratua më në fund nga Parlamenti Europian, pas marrëveshjes së arritur më herët në muajin qershor.

Ish-zv.presidentja e Komisionit Europian, Viviane Reding e konsideroi këtë si një arritje. “Pas 10 viteve të lodhshme ‘betaja e “roaming”’ ka përfunduar”, tha ajo. Sikurse e cilësoi Reding, kjo është një fitore për konsumatorët dhe një hap drejt një tregu dixhital europian të vetëm dhe të vërtetë.

Edhe përdoruesit e telefonisë celulare në Mbretërinë e Bashkuar të cilët do të udhëtojnë në Europë tani në vazhdim do të paguajnë të njëjtat çmime si ato në Angli.

Deputetja liberal-demokrate, Catherine Bearder u shpreh se një nismë e tillë, mbi të gjitha do t’i bëjë udhëtimet edhe më të lehta. Lajmi u mirëprit nga shumica e anëtarëve, megjithatë edhe kontestimet nuk munguan. Disa pretendojnë se kompanitë celulare do të kërkojnë ta nxjerrin sërish fitimin e tyre që merrnin nga shërbimi “roaming”, duke e bërë thjesht me rritje të përgjithshme në tarifat që ata ofrojnë.