Sondazhet e fundit tregojnë se ka një rrjedhje te thelle te elektoratit çam nga PDIU e Idrizit. Dy ditë më parë pjesëtarë të komunitetit çam, të cilët kanë ende çështje të pazgjidhura me Greqinë, krijuan Senatin Çam, i cili i kërkoi Lëvizjes Çame që të bashkojë të gjithë komunitetin për të pasur përfaqësuesit e tyre në Kuvend. Senati Çam u krijua nga Shoqata “Çamëria”, Instituti për Studime Çame, Lëvizja Çame dhe personalitete të njohura të komunitetit. Rrjedhja e elektoratit që Idrizi ka hasur në partinë e tij, e ka detyruar të anashkalojë planin për të dalë në koalicion me Metën, dhe duke kërkuar përkrahje nga Partia Demokratike, me shpresën se do të sigurojë disa vota, qofshin këto edhe jo të komunitetit çam. PDIU ka një marrëveshje të pa shkruar me PD-në duke i marrë disa drejtori, të cilat në fakt nuk kanë asnjë lidhje me interesat e komunitetit, për më tepër janë emëruar drejtorë që s’kanë asnjë lidhje me Çamërinë. 23 qershori duket si prova e zjarrit për Shpëtim Idrizin, i cili do të vërtetojë se a ia vlejti akrobacia që bëri në vitin 2009 kur votat socialiste i trafikoi nen flamurin cam tek Berisha. Artur Dojaka, kryetar i Lëvizjes Çame, deklaroi në një intervistë ne A1 Report se Vlora, Fieri, Elbasani, Durrësi edhe Tirana ku ka komunitet të përqëndruar çam do votojnë për bij çamë. “Por ne nuk duam të shkojmë të përçarë në zgjedhje, por të bashkuar. Komuniteti na dha bekimin t’i përfaqësojmë në zgjedhje, por gjithashtu na u dha dhe porosia e lutja që të bashkohemi edhe me përfaqësuesit e PDIU-së – shprehet ai
Z.Dojaka në një sondazh që është bërë në televizionin A1 Report rezulton se nga Partia për Drejtësi, Integrim dhe Unitet, ai që ka përfituar më tepër është Shpëtim Idrizi, duke lënë në vend të dytë kauzën çame dhe në vend të tretë vetë çamët. Zoti Dojaka, si do ta vlerësonit këtë sondazh?
Mendoj se sondazhi është mjaft i gjetur, sepse janë barometri më cilësor për të parë cila është situata aktuale. Unë jam shumë i prekur nga rezultatet e sondazhit për ata që kanë përfituar më pak nga PDIU-ja, pasi po shohim që ne çamët jemi më pak të përfituarit.
Por kjo i jep dhe një arsye forcës sonë, që ka rreth një vit e gjysmë që është krijuar, por në nëntor të vitit të shkuar ne e bëmë legale. Pas një komunikimi intensiv në komunitet për 20 vjet dhe pas kërkesës imediate për t’u përfaqësuar denjësisht, tashmë nuk është me sekret që në komunitetin tonë pakënaqësia është tepër e madhe e ndikuar shumë nga përfaqësia e organeve drejtuese të PDIU-së, të cilët kanë lënë pas dore çamët në tërësi, por dhe kauzën, siç e tregon edhe sondazhi.
Shtysë për sondazhin tuaj mund të ketë qenë dhe aktiviteti i dy ditëve më parë ku u krijua dhe Senati Çam që do të jetë mbi palët dhe ne aty ishim të ftuar si përfaqësues të Lëvizjes Çame.
Aty ishin përfaqësues të shoqatës Çamëria, të Institutit për Studime Çame dhe kryefjala e gjithë takimit ishte bashkimi i komunitetit. Komuniteti çam, paçka se ndihet shumë i zhgënjyer nga ekipi drejtues i PDIU-së, në thelbin e vet ka bashkimin.
Ne nuk duam të shkojmë të përçarë në zgjedhje, por të bashkuar. Komuniteti na dha bekimin t’i përfaqësojmë në zgjedhje, por gjithashtu na u dha dhe porosia e lutja që të bashkohemi edhe me përfaqësuesit e PDIU-së.
Jeni të hapur për bashkëpunim me zotin Idrizi?
Përpara se të kalojmë te bashkëpunimi që na u kërkua edhe nga komuniteti, dua të theksoj arsyet pse ne kemi ardhur në këtë pikë të sotme. Dhe janë tre: e para lidhet me mosparaqitjen e rezulotës çame në kohën e duhur dhe vonesa për miratimin e saj. Jo vetëm kaq, por është krijuar një makth. Zoti Idrizi kishte tre vjet e gjysmë ta paraqiste këtë rezolutë dhe ndoshta edhe ta kushtëzonte me votat e tij dhe të zotit Dashamir Tahiri në parlament.
Madje, doja të theksoja se është zoti Tahiri ai që ka marrë vota çame, sepse zoti Idrizi nuk ka dalë me vota çame, por nga një parti tjetër. Ndërkohë, ka humbur dhe mundësia për të krijuar një çështje juridike siç u përfol për një studio ndërkombëtare që do të vinte. Ne shohim që tani përpara zgjedhjeve nxirren karta, por këto janë gur themeli për komunitetin çam dhe ky merak ndihet tej mase në komunitetin tonë, duke filluar nga Vlora, Fieri, Elbasani, Durrësi edhe Tirana.
Zoti Dojaka, si është paraqitur çështja çame gjatë këtyre tre vjet e gjysmë, dhe sipas jush si mund të zgjidhet çështja çame?
Çështja çame nuk është një cështje që i takon vetëm këtyre viteve të fundit. Çështja çame ka lindur që nga momenti i atij eksodi të dhimbshëm që të gjithë e kemi para syve tanë, por me zhvillimet demokratike pas viteve ’90, edhe çështja jonë mori krah. Mori krah për arsye sepse i vunë shpatulla burra të ndershëm, të pjekur dhe patriotë. Ata të cilët edhe sot ne me lëvizjen tonë kërkojmë t’i respektojmë.
Që të flasim hapur, në këto tre vjet e gjysmë çështja çame ka bërë hapa mbrapa. E them këtë sepse kjo çështje tashmë është kthyer në një çështje pazaresh. Nuk është më çështje për Çamërinë, por për disa drejtori të cilat nuk kanë lidhje me çështjen çame. Bëhet fjalë për marrëdhënie të eksponentëve të PDIU-së dhe disa personave që për fatin e keq nuk janë as çam.
Sondazhi juaj e tregon më së miri se komuniteti ynë ndihet në një përqindje fare të vogël i përfaqësuar. Tashmë që kemi mandatin nga komuniteti për ta përfaqësuar, jemi zotuar që ta përfaqësojmë komunitetin në zgjedhjet e qershorit jo vetëm në mënyrë dinjitoze, por dhe me rezultate të larta.
Ne do të fokusohemi në pesë qarqe ku komuniteti ynë është prezent. Mund të themi se jemi të përgatitur dhe e ndiejmë frymën e suksesit që në ditët e sotme. Çamët kanë treguar se janë të aftë t’i bëjnë ballë situatës dhe të dalin në krye. Kemi një strukturë të mirorganizuar në gjithë këto qarqe, për më tepër të përbërë nga bij çam.
*****
Sondazhi/ Mungese e thelle besimi te Shpëtim Idrizi
Një sondazh me më shumë se 3300 qytetarë, i cili u zhvillua dje në A1 Report, tregoi shifra alarmante për sa i përket përfaqësimit të komunitetit çam nga partia që drejton Shpëtim Idrizi. Në fund të sondazhit, pyetjes se kush ka përfituar më shumë nga PDIU, rezultoi se më shumë se 80 për qind mendojnë se ka përfituar vetëm kryetari i saj, Shpëtim Idrizi. Afro 17 për qind mendojnë se ka përfituar kauza e çështjes çame, dhe vetëm 2.4 për qind mendojnë se kanë përfituar çamët.