Partizani përballë Krasnodarit në ndeshjen “play off” të Europa League me dilema në mbrojtje. Reparti tek i cili Adolfo Sormani do të mbështetet më tepër, i krijon jo pak problem trajnerit të kuq. Situata më delikate rreth së cilës stafi teknik po provon të gjitha alternativat mbetet krahu i majtë i repartit difensiv, prej mungesës së të skualifikuarit, Kalari.
Trajneri Sormani ka eksperimentuar gjatë, ku përveç Atandës që duket i destinuar të jetë zëvendësues, ka provuar në këtë pozicion edhe Emiljano Vilën e Lorenc Trashin. Dy lojtarët qëndruan pushim në seancën e fundit stërvitore të zhvilluar në periferi të kryeqytetit përpara ndeshjes së parë dhe sipas stafit mjekësor lojtarët vuanin shqetësime të vogla dhe vendimi u morr për të mos vënë në dyshim prezencën e tyre ndaj Krasnodar.
Zgjedhjet për stafin teknik do të ishin më të lehta nëse Fejzullahu do të ishte në formë optimale dhe do të luante në krahun e djathtë të mbrojtjes, duke spostuar majtas Ibrahimin. Por, kjo është një alternativë e parealizueshme prej faktit që lojtari i lindur në Preshevë nuk është stërvitur mjaftueshëm.
Megjithë dilemën që duhet të zgjidhë, përveç punës taktike, trajneri Sormani ishte i përqendruar te krijimi i një “bunkeri”, me objektivin për të marrë rezultat pozitiv në sfidën që do të luhet në qytetin në veri-lindje të Detit të Zi. Skuadra punoi me goditjet standarde, për të bllokuar një kundërshtar që nuk është cilësor vetëm në aspektin teknik, por edhe mjaft i fort në luftën në ajër.
E ndërkohë që skuadra pret sfidën dhe do të zhvillojë stërvitjen e fundit në impiantin modern “Krasnodar Stadium”, me kapacitet 33 mijë vende, nga Partizani konfirmohet largimi i sulmuesit slloven, Dalibor Volas. Nëpërmjet një postimi në Twitter, ai njoftoi se rezervoi biletën për t’u kthyer në shtëpi, duke lënë të nënkuptohej se aventura te të kuqtë përfundoi.
Shanset e Partizanit per tu kualifikuar, jane pothuajse ZERO! Vetem nje mrekulli, qe nuk parashikohet te ndodhe, e ben Partizanin triumfues ne kete perballje!