Partizani, gjashtë pikë të detyrueshme për Evropën

Partizani dhe Kukësi janë çifti më interesant i javës së 29-të të kampionatit, për shkak të objektivave që kanë skuadrat dhe efektin që mund të ketë ndeshja midis tyre në garën për titullin kampion. Kuksianët kanë marrë zjarr me pesë fitore radhazi, por për të fituar titullin duhet në radhë të parë të mundin të kuqtë, e më pas të shpresojnë te ndonjë mrekulli e Besës në shtëpinë e Skënderbeut. Ndeshja ka rëndësi shumë të madhe edhe për Partizanin, pasi të kuqtë duan të luajnë në Evropë, për herë të parë pas shumë vjetësh mungesë. Edhe pse Kukësi është skuadra më e mirë aktualisht, mbrojtësi Amir Rrahmani është shprehur se Partizani do të bëjë të pamundur për të marrë fitoren dhe për mbajtur gjallë shpresat për arritjen e objektivit. Skuadra e Marcio Sampaios vjen nga humbja me Teutën, por për mbrojtësin e ri nuk ka vend për të dëshpërim. “Humbjet ndodhin për çdo skuadër, aq më tepër që luanim jashtë. Ndoshta do të ishte më e hidhur po ta kishim pësuar në fushën tonë. Nuk besoj se tifozët na mbajnë mëri për këtë rezultat dhe ne jemi të bashkuar”, tha mbrojtësi. Të kuqtë kanë dy ndeshje radhazi brenda, kundër Kukësit e Kastriotit, në të cilat Rrahmani kërkon maksimumin e pikëve. “Të paktën në dy ndeshjet në fushën tonë, me Kukësin dhe Kastriotin, duhet të marrim fitore. Ne në çdo ndeshje kërkojmë maksimumin, por gjashtë pikë në dy takimet e radhës janë shumë të rëndësishme për arritjen e objektivave”, thotë Rrahmani. Partizani do të ketë edhe një ndeshje tjetër brenda më pas, kundër Skënderbeut, çka e bën skuadrën e kuqe një faktor të rëndësishëm edhe në luftën për titull. Ndërkaq, në dy takimet e mëparshme në këtë kampionat, Partizani ka arritur një fitore dhe një barazim kundër Kukësit, çka duket një ogur i mirë për ndeshjen e së dielës në stadiumin kombëtar “Qemal Stafa”.