Milo: Torta e pushtetit u nda me uri nga PS-LSI, për ne as thërrime

Kryetari i Partisë Demokracia Sociale, Paskal Milo, komenton raportet me PS-në. Në një intervistë për gazetën “Tema”, Milo thotë se  “jemi bash në momentin që pa dëshirën e vullnetin tonë kanë filluar të na grumbullohen në kokë dyshime për një taktikë zvarritëse, e cila ndofta po dëshmon se “torta” e pushtetit u nda me uri në fillim midis PS e LSI dhe për “vëllezërit “ e vegjël te familjes nuk kanë mbetur as edhe thërrime”.

Në parim marrëveshja midis PDS-së dhe PS-së  është në fuqi sepse asnjëra prej të dy partive nuk është deklaruar zyrtarisht se është kundër saj. Nuk bëhet fjalë që PDS të ketë një qëndrim tjetër veç atij të shprehur me dhjetëra herë nga institucionet drejtuese të partisë e prej meje personalisht. Ka një ngadalësi në zbatimin e saj nga PS që mund të ketë qenë disi e justifikuar deri tani për shkak të prioriteteve e të vështirësive të qeverisë ,për shkak të një situate krize e boshllëku financiar të trashëguar nga qeveria e mëparshme si dhe për shkak të një agresiviteti patologjik të opozitës së sotme, e cila sa herë që largohet nga pushteti e përjeton në mënyrë dramatike dhe kërkon me çdo kusht e me çdo çmim të rikthehet aty.  Por, vjen një moment që edhe argumentet në favor të justifikimeve konsumohen, nuk janë më bindëse. Jemi bash në momentin që pa dëshirën e vullnetin tonë kanë filluar të na grumbullohen në kokë dyshime për një taktikë zvarritëse, e cila ndofta po dëshmon se “torta” e pushtetit u nda me Uri në fillim midis PS e LSI dhe për “vëllezërit “ e vegjël te familjes nuk kanë mbetur as edhe thërrime.  Ne , e kemi bërë të qartë që në fillim se nuk kemi kërkuar dhe as nuk kërkojmë më shumë se çfarë na takon nga marrëveshja e nënshkruar dhe e pranuar nga të dy partitë:përfaqësim politik në pushtetin e administratën qendrore , në nivel zëvendës ministrash, drejtori të përgjithshme, drejtori në ministri të ndryshme, në drejtori rajonale , në pushtetin vendor dhe krijimin e mundësive për konkurrim të ndershëm e pa paragjykime të potencialeve tona profesionale dhe intelektuale për punësim”, thotë ai.

Ndërsa në lidhje me qeverisjen e deritanishme të kabinetit “Rama”, ish-ministri i Jashtëm thotë se ka përpjekje serioze dhe angazhim të spikatur të qeverisë për të bërë realitet premtimet e dhëna. “Veçanërisht kryeministri është njeriu që po punon non stop për të drejtuar ekipin me politika sa novatore aq edhe me këmbë në tokë për të shënuar progres të prekshëm në reforma. Por konstatoj vonesa , të cilat janë sa objektive  aq edhe për arsye të vështirësive të paparashikuara që po dalin rrugës qoftë për shkak të të panjohurave, qoftë edhe për shkak të vonesave të shkaktuara në reformimin e administratës qendrore e lokale. Faktori kryesor pengues është obstruksionizmi i opozitës ,e cila ende pa dorëzuar pushtetin , që në 24 qershor filloi të akuzojë e të vendosë mina me sahat e me shpërthim të vonuar në punët e financave, të projekteve e të qeverisjes normale të vendit duke abuzuar në mënyrë te veçantë me periudhën e gjatë tranzitore të ndërrimit të pushteteve”, shprehet ai, duke theksuar se pesë muaj janë pak për të bërë një bilanc serioz e për të gjykuar performancën e një qeverie.

Ndërsa në lidhje me opozitën, Milo shprehet se modeli “Berisha” ndiqet ende nga PD, e cila ndonëse ka një lider të ri politik, ish-kryetari është në fakt violinë e parë e kësaj partie dhe hapur apo në prapaskenë ndikon në vendimmarrjen e në politikat e partisë.

“Pa largimin e tij ende e për shume vite të tjera, PD dhe kryetari i saj nuk do të çlirohen nga mendësia e filozofia e tij politike konfliktuale. Dhe jo vetëm PD, por edhe politika shqiptare. Nuk është i vetëm model konfliktual jo nga ngjyra politike e nga mosha , ka edhe të tjerë , edhe majtas edhe djathtas. Ky proces do të kërkoj kohë ndaj edhe kultura politike e dialogut konstant do të vonojë të vijë në  Shqipëri. Do të vazhdojmë të jemi të detyruar që më tepër të ndodhemi në një konflikt verbal permanent , me pauza të sforcuara ose te imponuara të një dialogu të përkohshëm. Jemi të dënuar ta vuajmë për faj të trashëgimisë historike si komb që më tepër jemi grindur sesa jemi marrë vesh me njëri –tjetrin”.