SHËNIM: Uragani i varfërisë dhe jorgani i pasurisë

“Protesta e 20 shkurtit shtroi shtratin për një uragan mbarëpullor”-deklaroi dje kryetari i emëruar i Partisë Demokratike Lulzim Basha, një ditë pas protestës së 20 shkurtit. “shtroi shtratin: wshtw kaq patetike gjuhësisht, megjithatë…  Lulzim Basha është duke folur për uragan, ai dje ka artikuluar në mënyrë të përmbledhur dhe kushtet që sipas tij duhet të plotësohen nga qeveria si kushtëzim që kjo e fundit të mos përballet me uraganin.

“- Të tërheqin menjëherë projektligjin  famëkeq  që  synon shkatërrimin e ligjit konsensual për Nëpunësin Civil që ka qenë dhe është një  kusht për marrjen e statusit të vendit kandidat në BE.

-Të zbatojnë menjëherë vendimin Gjykatës Kushtetuese që e cilëson antikushtetues aktin normativ për këtë ligj.
-Të ndalin menjëherë luftën politike dhe personale kundër institucioneve të pavarura përmes vendimeve antikushtetuese dhe të paligjshme si rasti i djeshëm flagrant i sulmit të paligjshëm ndaj kreut të ILDKP-së

-Të pranojnë në rrugë institucionale  konsensusin  politik me opozitën në të gjitha hallkat e  procesit  të draftimit  dhe votimit  në sallën e Kuvendit të reformës territoriale-administrative dhe aspekteve të tjera të kësaj reforme që kanë të bëjnë me decentralizimin dhe procesin elektoral.

– Të marrin përgjegjësi për premtimet e tyre elektorale të 23 qershorit”,- ka renditur dje Basha.
Nga 5 pika të renditura prej tij, 3 lidhen vetëm dhe vetëm me administratën shtetërore ekzistuese, të cilën Berisha dhe Luli e mbipopulluar me besnikë dhe militantë sidomos pas janarit 2011. Dy kushtet e fundit janë njëri për reformën territoriale, ndërsa tjetri për premtimet elektorale të PS-së në fushatë. Këto dy të fundit, janë një lloj garniture e nevojshme që Luli të shprehë se ku e ka hallin pa rënë shumë në sy.

Në fakt halli i vërtetë i Lulit është pikërisht administrata. Por jo thjesht punësimi i militantëve demokratë, por sidomos “levat e sigurisë” që Berisha dhe vetë Luli kanë lënë në administratë. Bëhet fjalë për funksionarë të rëndësishëm shtetërorë të emëruar gjithandej, sidomos në drejtori kyçe, në sistemin e drejtësisë në institucionet e sigurisë. Janë funksionarë të cilëve Berisha dhe Basha u kanë besuar “amanetin” për të vënë shkopinj në rrotat e cilësdo iniciativë që mund t’i përballë ata me përgjegjësitë dhe abuzimet e kryera në 8 vite qeverisje.

Ky është halli i vërtetë i Lulit, por sidomos i Berishës. Ndaj dhe, ndonëse ndërmjet Lulit dhe mentorit të tij, Berishës ka pasur një diferencë të lehtë në artikulimin publik për protestën, arsyet se përse po përpiqen të demoinstrojnë forcë dhe uragan i kanë të përbashkëta: Kërkojnë të jenë të paprekshëm.

Por të dy ata, si pa kuptuar janë duke arritur dhe një tjetër objektiv, jo më pak të rëndësishëm duke mbajtur linjën e daljes në rrugë. Kanë arritur të shmangin vëmendjen nga zhvillimet brenda PD-së pas humbjes tronditëse më 23 Qershor. Mediat pranë Lulzim Bashës kanë më shumë se dy muaj që po injektojnë një frymë të gënjështërt që e paraqesin Lulin si reformator dhe duke e konsideruar gardën e ish-ministrave të Berishës si njerëz që “nuk ia duan të mirën Lulit” apo si ish-ministra që nuk kanë marrë përgjegjësitë për humbjen.
Kjo linjë nuk është e rastësishme, pasi Lulzim Basha, ai që del në shesh për të qarë hallet e popullit, aktualisht ka hyrë në në një proces intensiv të spastrimit të figurave politike në PD që nuk mendojnë si ai, apo që nuk i duken Berishës mjaftueshëm të besueshëm sa për ti pasur nëpër këmbë.

Basha ka distancuar thuajse të gjithë peshat e rënda të kryesisë apo të Këshillit Kombëtar të PD-së, Patozi, Ruli, Rusmali janë zëvendësuar me Gertin, Ennon dhe Gridën. Një pjesë e mirë e kryesisë nuk ka asnjë kontakt me kryetarin e vetë dhe e gjitha kjo nuk është e rastësishme.

Berisha dhe Basha janë duke projektuar lëvizjen e radhës duke larguar gradualisht figurat e njohura në PD nga postet drejtuese dhe duke i zëvendësuar ata me fytyra të reja që njihen vetëm si ithtarë të 2B duke arritur në këtë mënyrë që nëpërmjet makijazhit të shmangin dhe analizën për zgjedhjet e 23 Qershorit.

Pra, protesta dhe linja e protestave që Luli i quan uragan, nuk janë gjë tjetër veçse një skemë e përzgjedhur me qëllim arritjen e paprekshmërisë penale dhe spastrimin  e të gjithë linjës “së bezdisshme” të ish-ministrave në parti.  Ose e thënë ndryshe është e gjitha një lëvizje që Xeni në këto ditë të ftohta të mos ketë nevojë për jorgan por të vazhdojë të shlodhet i qetë ishujt ekzotikë plot diell dhe Luli të vazhdojë e të pozojë si kryetar i PD-së, një parti që nuk po don ta kuptojë humnerën e madhe që po hap mes vetes dhe qytetarit shqiptar.

* * *

Trajektorja 23-vjeçare e pasurimit të familjes Berisha

Nga një apartament modest dhomë e kuzhinë që kishte në Tiranë në vitin 1991, 22 vjet më vonë, familja Berisha posedon një pasuri me vlerë qindra miliona euro. Pa asnjë biznes të deklaruar zyrtarisht, Sali Berisha, Argita dhe Shkëlzeni kanë në pronësi dhjetëra apartamente në Tiranë, zyra superluksoze në zonat më të rëndësishme të kryeqytetit, kompleks vilash në Farkë, dhjetëra llogari bankare, vila në Gjirin e Lalzit, vila në bregdetin e Jugut, prona të pafundme dhe shumë pasuri të tjera të patundshme të padeklaruara. Por, pasuri të tjera të dyshimta po dalin në pah. Bëhet fjalë për zyrat e reja luksoze të Shkëlzenit, Berishës dhe Argitës.

Fëmijët e ish-kryeministrit, por edhe vetë ai, kanë zyra në zonat më te shtrenjta të Tiranës. I biri, Shkëlzeni, ka dy kate në pallatin pranë Liqenit Artificial dhe parkut. Aty janë vendosur zyrat që frekuentohen nga njerëz të biznesit. Zyrat e reja të Shkëlzenit kanë një sipërfaqe qindra  metra katrorë dhe vetëm qiraja mujore për këtë sipërfaqe e tejkalon disa herë pagën e deputetit Berisha.

Vetë Berisha, pas largimit nga pushteti, u zhvendos në kullën më të shtrenjtë të Tiranës. Nuk dihet nëse ai i ka blerë zyrat, i ka marrë me qira apo ia kanë bërë dhuratë, por paga mujore e deklaruar nga Sali Berisha nuk mjafton për të paguar qiranë për zyrat perandorake.

Ndërsa vajza e tij, Argita, e njohur ndryshe në rrethet politike si “zonja 3 milionë euro”, për shkak të tarifave të saj për biznesmenët që synonin të investonin në Shqipëri me firmën e babait të saj, vijon të mbajë zyrat e avokatisë në një nga zonat me të frekuentuara nga bota e biznesit në Tiranë, në Rrugën e Barrikadave. Argita, përveç dhjetëra apartamenteve në Tiranë, posedon vila në Gjirin e Lalzit dhe Farkë.

* * *

Djemtë e politikanëve shqiptarë

Nga gazeta Express

Jo vetëm djali i Ibrahim Rugovës, Uka, është në mesin e familjarëve të politikanëve që ka probleme me ligjin.

Edhe fëmijët e politikanë të tjerë të Kosovës dhe Shqipërisë janë në mesin e atyre që dyshohen, akuzohen dhe gjykohen për shkak se s’kanë respektuar ligjin.

Kështu, fëmijët e Fatmir Sejdiut, Isa Mustafës, Sali Berishës, Adem Grabovicit, Shkurti Bujës, Hashim Rexhepit e Sabri Hamitit, janë në mesin e atyre njerëzve që përfolën për përfshirje në vepra të jashtëligjshme.

Megjithatë, sot, djali i Ibrahim Rugovës, Uka, u prangos nga policët e EULEX’it.

Ndërsa djali i Fatmir Sejdiut, Bardhyli, në gusht të vitit 2013 ishte përfshirë në një përleshje të armatosur dhe kishte shtënë në drejtim të disa personave në lagjen “Taslixhe” të Prishtinës. Pas kësaj, Bardhyli kishte bërë kërkesë për mbrojtje të afërt policore.

Djali i kryetarit të LDK’së, Isa Mustafa, Arbeni ishte përfshirë në një skandal në nëntor të vitit të kaluar, në kohën e fushatës zgjedhore. Ai bashkë me këshilltarin e Ismet Beqirit, Shpëtim Haziri, ishin filmuar nga një aktivist i Vetëvendosjes duke joshur me para për të hyrë në LDK.

Edhe fëmijët e Adem Grabovcit janë bërë të famshëm për keq në Kosovë.

Djali i Ademit, Guximi në shkurt të vitit 2013 ishte përleshur me policin e Kosovës, Avni Selaçi, duke e grushtuar dhe duke e lënduar rëndë në sy dhe në ballë. Pas këtij rasti është ngritur aktakuzë fillimisht pë kundërvajtje, por pas raportimit të mediave, prokuroria kishte akuzuar Guximin edhe për pengim të personit zyrtar në kryerjen e detyrës zyrtare. Aktakuzë ndaj Guximit ka ngritur edhe Prokuroria e Pejës, pasi në muajin gusht, policia i kishte gjetur në bagazhin e veturës dy armë luftarake: Një kallashnikov me 90 fishekë dhe një pushkë gjuetie me 31 fishekë.

Veç kësaj, gruaja e Adem Grabovcit, Kumrija ishte plagosur në maj të vitit 2012 dhe ishte dërguar në QKUK pasi plumbi e kishte goditur në bark. Në atë kohë, Policia njoftonte se Kumrija është vetëplagosur.

Edhe Valon Buja, i biri i ish- kryetarit të Komunës së Lipjanit, Shukri Buja, në gusht të vitit 2013 kishte dëmtuar pompën “Valoni Petrol” në Veternik të Prishtinës, kur e ka goditur me BMW-në e tij të cilën po e ngiste me shpejtësi të madhe. Dëshmitarët kishin thënë se përpjekja për të hyrë në pompë natën e së shtunës me shpejtësi mbi 120 kilometra në orë ka rrezikuar jetën e punëtorëve dhe të klientëve të pompës.

Për dallim prej djemve të tjerë të politikanëve, djali i ish-Guvernatorit, Hashim Rexhepi, Gentiani është dënuar më 22 vjet burgim. Ai është dënuar për vrasjen e Arben Gashit, ngjarje e cila kishte ndodhur me 2 janar të vitit 2009 në afërsi të lokalit “Garden” në Prishtinë. Djali tjetër i Hashimit, Graniti, i cili është akuzuar për pjesëmarrje në rrahje, është shpallur i pafajshëm.

Edhe djali i Nënkryetarit të Kuvendit të Kosovës, Sabri Hamitit, Urtaku, në gusht të vitit të kaluar ishte bërë lajm kryesor në mediat e Kosovës dhe një pjese të Kroacisë. Policia e Shtetit kroat patën arrestuar Urtakun si Zëvendësambasador i Kosovës në Kroaci pasi dyshohej se kishte vozitur i dehur rrugëve të Zagrebit. Pas kësaj, ai është kthyer në Kosovë, ndërsa të martën ka fituar betejën ndaj Ministrisë së Punëve të Jashtme, pasi që Këshilli i Pavarur Mbikëqyrës për Shërbim Civil i Kosovës (KPMSHCK) e ka shfuqizuar vendimin “për suspendim deri në dy vjet nga e drejta për t’u caktuar në post”.

Edhe në Shqipëri fëmijët e politikanëve përfshihen në skandale të ndryshme.

Familja e Sali Berishës – duke përfshirë djalin e tij, Shkëlzeni dhe vajzën Argitën – vazhdimisht akuzohet nga partitë opozitare se kanë arritur milionat në mënyrë të jashtëligjshme.