PD: Gjoba politike gjatë protestës kundër çmimit të naftës. MPB: Shpifje

Partia Demokratike denoncon se janë vendosur gjoba ndaj drejtuesve të automjeteve gjatë protestës së të hënës, ku makinat u ndalën për të kundërshtuar çmimin e lartë të naftës.

Deputeti demokrat Arben Ristani deklaron se gjobat politike janë të urdhëruara nga Edi Rama, ndaj protestuesve për çmimin e lartë të naftës, për shkak të taksave të qeverisë, janë të paligjshme.

Sipas tij, drejtoritë e policisë së çdo qarku, janë njoftuar për protestën, sipas ligjit në fuqi dhe se gjobat janë thjesht ndëshkim i hakmarrësit Rama, që refuzon të dëgjojë qytetarët e vendit.

Reagon MPB: Shpifje e radhës

Ministria e Punëve të Brendshme reagon ndaj deklaratës së deputetit Ristani, duke e cilësuar si shpifje të radhës.

MPB sqaron se në të gjithë territorin e vendit në datë 26.01.2015, shërbimet e Policisë Rrugore morën masa për të menaxhuar trafikun e rënduar dhe nuk kanë vendosur asnjë masë administrative me gjobë për mjetet, megjithëse ato ndaluan në kundravajtje duke bllokuar trafikun dhe sollën shqetësim dhe vonesë për përdoruesit e tjerë të rrugës.

Në vijim thuhet se shërbimet e Policisë Rrugore kanë identifikuar të paktën 330 automjete që ndaluan duke bllokuar trafikun, kryesisht autovetura, të cilat shkelën nenin 20 të Kodit Rrugor që parashikon: “Cilido që zë sipërfaqen rrugore pa lejen përkatëse, ose që, duke pasur leje, nuk zbaton kushtet e saj, i nënshtrohet masës administrative me gjobë nga njëzet e pesë mijë deri në njëqind mijë lekë”, por për asnjë prej tyre nuk është marrë masë.