PD padit Veliajn: Vendimet e 30 dhjetorit, të pavlefshme. Reagon Bashkia: Opozita, agresivitet barbar

Partia Demokratike ka vendosur të padisë kryetarin e bashkisë së Tiranës, Erion Veliaj në lidhje me vendimet e datës 30 dhjetor, duke i cilësuar si në shkelje me ligjin dhe të pavlefshme.

“Vendimi i Erion Veliajt për rritjen me 50 milionë dollarë të taksave vendore është i pavlefshëm sepse është ndërmarrë pa u dekretuar ende ndryshimi i ligjit ‎nga Presidenti i Republikës për taksat dhe tarifat vendore. Për të njejtën arsye, fakti që bazohen në një akt që ende nuk ka fuqi është i pavlefshëm dhe miratimi i buxhetit 2016 të Bashkisë”, tha këshilltari demokrat, Fabian Topallaj.

Edhe vendimi për dhënien me koncesion të Parkut Rinia për 35 vite për ndërtimin e një parkingu nëntokësor, për demokratët është i paligjshem, si edhe vendimi per rritjen e çmimit të biletës për transportin urban brenda qytetit.

“Vendimi i Veliajt marrë në mesnatë si një hajdut ordiner, për të rritur çmimin e biletave për qytetarët është një tjetër aferë e pastër korruptive që do të çojë në xhepat e Veliajt dhe ortakëve të tij rreth 6 milionë dollarë çdo vit. Edhe ky akt është i pavlefshëm sepse ai ka kaluar në Këshillin Bashkiak pa respektuar procedurën dhe afatet ligjore”, tha përfaqësuesi i PD.

Por, Bashkia pretendon se me buxhetin e saj për vitin 2016, është më i madhi për këtë institucion dhe synon të zgjidhë një sërë problemesh, si investimet në shkolla, shtrirjen e rrjetit të transportit urban në të gjithë qytetin, etj. Sipas Bashkisë, paketa e vitit 2016, ul taksat për biznesin e vogël si dhe për fermerët që punojnë tokën në pjesën rurale të qytetit.

“Fatkeqësisht, masat e guximshme të ndërmarra nga Bashkia e Tiranës u ndeshën me agresivitetin barbar të disa këshilltarëve të opozitës, të nxitur drejtpërdrejtë nga njeriu që për 4 vjet e degradoi qytetin dhe i’u fsheh si struci çdo vendimi të rëndësishëm për qytetin.

Pasi për 4 vjet nuk i dha zgjidhje as këtij problemi, e as ndonjë gjëje tjetër sepse qytetin e drejtonte nga Hollanda, tani tërbohet e nxit një gjuhë urrejtje kur sheh se zgjidhjet ishin të mundura, por Lulzim Basha s’pati kurrë guximin t’i ndërmarrë ato.

Pastrimi i qytetit, ndriçimi e zbukurimi i tij, zgjidhja e transportit urban, çerdhet e riparuara, shkollat e reja, riparimi i rrugëve e trotuareve, janë provat e paaftësisë së tij, ndaj dhe ai i sul taborët e anti-qytetarisë kundër zhvillimit të qytetit”, thotë bashkia/Dita/