Partia Demokratike akuzoi sot Qeverinë se po krijon fasada dhe jo vende pune. Në një deklaratë për mediat, një ditë pasi Kryeministri Edi Rama inauguroi Zyrën e re të Punës në Tiranë, deputeti demokrat Myqerem Tafaj e cilësoi thjesht si shoë ceremoninë e zhvilluar, pasi sipas tij ky shërbim ofrohet në Shqipëri prej 9 muajsh. “Qeveria e Partisë Demokratike e ka nisur këtë projekt që në mandatin e saj të parë, dhe me pilotim arriti ta realizonte në Tiranë e në Korçë, falë edhe bujarisë së qeverisë Suedeze. Prej 9 muajsh, shërbimi ofrohej në 36 qytetet e vendit“, tha Tafaj. Sipas ish-ministrit të Arsinimit në Qeverinë ‘Berisha’, vendet e reja të punës ishin të vlefshme dhe mund të kontrolloheshin nga qytetarët e vendit, në çdo qytet të Shqipërisë, on-line, por ndihma për të papunët jepej edhe nga punonjësit e këtij shërbimi në këto zyra.
“Është qesharake se si për një dekor, për një tapet dhe për një fasadë të re, qeveria e Ramës të trumbetojë sikur dje ka ndodhur mrekullia. Edhe zyra e inauguruar dje, në fakt ofron ato vende pune që ishin ndërkohë të shpallura nga zyra e punësimit në Tiranë. Pra nuk kemi asnjë vend të ri pune, por kemi thjesht një fasadë të re në qytet. Premtimi i Edi Ramës për hapjen e 300 mijë vendeve të punës nuk mund të fshihet me akte televizive dhe me shfaqje me ngjyra“, tha Tafaj.
Sipas tij, ky premtim nuk realizohet duke mohuar punën e qeverisë paraardhëse dhe shërbimet ekzistuese. “Vendet e reja të punës hapen vetëm me vizionin e duhur, me platformën e duhur, dhe hapen kur qeveria punon shumë, dhe jo kur krekoset para kamerave pa bërë asgjë”, përfundon deklarata për mediat e deputetit Tafaj