Një koncert i zhvilluar në një shkollë në Pejë për pak sa nuk u kthye sot në tragjedi. Mbi 20 nxënës të shkollave fillore u lënduan kur gjatë koncertit, një pjesë e tavanit u shkëput dhe mbi kokat e tyre. Nxënësit ndodheshin në palestrën sportive “Karagaçi” në një koncert humanitar që ishte organizuar për të ndihmuar nxënësen Djellza Nimanaj nga Deçani, e cila vuan nga leuçemia. Zëdhënësi i policisë Rajonale të Pejës, Xhevat Ibraj ka thënë për mediat kosovare se 21 persona të moshave rinore janë të lënduar, ndërsa dy nxënëse janë në gjendje më të rëndë dhe janë dërguar në QKUK. “Akoma nuk i kemi informatat e konfirmuara sepse të gjitha ekipet hetimore të emergjencave dhe prokurori janë në vendngjarje dhe deri tani këto janë të dhënat që i kemi. Kur të kthehen nga terreni ekipet do të njoftoheni më në detaje”, tha Ibraj për Kosovapress.