Nga data 18 gusht deri në 25 gusht do të zhvillohet peligrinazhi i përvitshëm në malin e Tomorrit për kremtimin e festës bektashiane të Abaz Aliut.
Ndërsa mijëra pelegrinë do të vizitojnë malin e Tomorrit në festën rituale të përvitshme, Drejtoria Vendore e Policisë Berat në një njoftim për shtyp ka bërë të qarta masat e marra për garantimin e rendit dhe sigurisë publike gjatë zhvillimit të pelegrinazhit.
Gjatë 8 ditëve, do të rritet prezenca e shërbimeve të Policisë Rrugore në akset kryesore, për përballimin e fluksit të automjeteve, orientimin dhe marrjen e masave ndaj drejtuesve që shkelin rregullat e qarkullimit rrugor si dhe parandalimin e aksidenteve automobilistike.
Këto masa janë shtuar për krijimin e një mjedisi sa më të sigurtë për të gjithë shtetasit vendas e të huaj që do të marrin pjesë në këtë pelegrinazh, ndërsa janë përcaktuar edhe vendqëndrimet të automjeteve të Personaliteteve të Larta Shtetërore.
Gjithashtu bëhet e ditur se është ndaluar qarkullimi i mjeteve të tonazhit të rëndë që transportojnë pllaka guri nga mali në qytet, për të mos kufizuar lëvizjen e automjeteve ndërsa mjetet të Transportit Publik duhet të ndalojnë qarkullimin nga aksi nacional për në Teqen e Kulmakut.