Çfarë kuptuam nga zgjedhjet e Dibrës

Nëse zgjedhjet e parakohshme lokale kanë një avantazh për vendin ku zhvillohen, ky është publiciteti dhe vëmendja e pazakontë që merr zona. Kështu ndodhi dhe në Dibër: Fushatë, politikanë, deputetë, makina e njerëz të njohur e të panjohur, premtime dhe akuza…

Gati të krijohet përshtypja se këtej e tutje gjithë qeveria do punojë për Dibrën, ashtu si gjithë opozita mezi ç’pret të vijë në pushtet për ta bërë parajsë atë rajon, të cilin… në të vërtetë, natyra e nisi për parajsë.

Gjithçka mbaroi dje. Kur ky numër i DITA-s në dalë në treg, paralelisht do dëgjojmë dhe shifrat e para të numërimit të rreth 34 mijë votave, nga 57 mijë votues gjithsej.

Aty do kuptojmë nëse dibranët janë zemëruar vërtet nga videoja e Shukriut duke e lidhur gjestin e individit me koalicionin që e kandidoi; nëse këtë ngjarje e kanë perceptuar si incident/skandal personal, apo ndoshta edhe grackë të ngritur nga të tjerë; apo do vendosin ta kalojnë votën e tyre drejt opozitës.

Siç lexuesi e ka vënë re, në këto faqe i kemi dhënë hapësirë mesazheve për më shumë vëmendje për Dibrën, jo thjesht për fushatë. Për Dibrën të cilës “Tirana” i merr ujërat, HEC-et, tokat, pasuritë e tjera, por i kthen mbrapsht pakogjë, në mos aspak. Rrugën e Arbrit kanë në gojë të dyja palët politike, por edhe ky projekt i madh sado që nisi nga qeveria aktuale, ka ngecur.

Ky skepticizëm dhe kjo thirrje, në fakt është për çdo zonë për të cilën politika kujtohet veç për zgjedhje. Sidomos kur zgjedhjet janë “teke”, të parakohshme, dhe çuditërisht shikohen si test politik, kjo për të zezën e banorëve.

Sepse ata nuk duan “të testohen” më, të jenë eksperiment, letër lakmusi. Thjesht duan një jetë më të mirë, mundësi për punë e shërbime normale.

Këto mundësi, deri dje ua kanë premtuar Sherefedin Shehu i PD-së dhe Muharem Rama i koalicionit të majta. Shero në fakt, mbathi opingat dhe u ngjit në Dibër duke lënë pas mandatin e humbur të deputetit.

Mjeku Muharem, në fund të fundit do vijojë profesionin edhe nëse humbet këto zgjedhje. Nëse Sheros do t’i mbeten opingat apo Muharemit stetoskopi, do ta mësojmë shumë shpejt.

Por skepticizmi se diçka do ndryshojë për mirë në Dibër apo jo, ka për të mbetur…