Për “gjetjen” që na i ka shtuar shumë shpresat se më në fund do ecim edhe ne drejt civilizimit e mbrothësisë (dhe për gjithë “mendjet pjellore” që janë shfaqur pas ’90-s)

Nga Viktor Malaj

Botuar në DITA

Tani që Ministrja jonë e Bujqësisë njoftoi se së shpejti do të hapet në Shqipëri Akademia e Bujqësisë, u shtuan shumë shpresat se vendi ynë do të shpejtojë ecjen e vet drejt civilizimit dhe mbrothësisë.

Shumë njerëz u çuditën me përdorimin e termit “akademi”, por kjo tregon thjesht mosdijen e tyre. Duke e nuhatur këtë mosdije, zonja Ministre shpjegoi se të tilla akademi ndodhen edhe në Zvicër, Spanjë etj.

Duke e ditur se fjala “akademi” vjen nga greqishtja e lashtë dhe, konkretisht nga emri Akademus i një heroi të Arkadias, afër Athinës, që besohej se e shpëtoi Athinën nga sulmet e Spartës, në ullishtet e të cilit mblidheshin filozofët e kohës nën drejtimin e Platonit, ne mund të marrim me mend përshtatshmërinë e këtij emri me institucionin shkencor që do të ngrihet në Shqipëri për përgatitjen e njerëzve që do të mbarështojnë bagëtitë.

As kardinali francez Rishëlië (Richelieu) nuk e njihte mirë kuptimin e fjalës “akademi” kur themeloi në vitin 1635 Akademinë Franceze me qëllim studimin dhe ruajtjen e pastërtisë së gjuhës frënge dhe vendosjen e standardeve të përdorimit të saj.

Mendja e ngushtë e kardinalit të lartpërmendur dhe e dhjetëra themeluesve të akademive të tjera të botës, duke përfashirë edhe Akademinë e Shkencave të Shqipërisë në vitin 1972, nuk mund ta rrokte domethënien e vërtetë të këtyre insitucioneve të dijes, siç i përkufizon Fjalori i Gjuhës Shqipe, si “institucione të larta shkencore që merren me drejtimin e punës shkencore dhe me kërkime e studime”.

Akademitë e lartpërmendura ishin vende ku “rrihej ujë në havan” me gjithfarë teorizimesh të kota filozofike e linguistike apo flitej e diskutohej pa fund për letërsinë dhe artet, mirëpo ato asnjëherë nuk prodhonin qumësht, djathë, vezë, gjalpë, mish jo se jo.

Mendjet pjellore në Shqipërinë tonë u shfaqën pas vitit 1990. Akademinë e parë me vlera shkencore dhe prodhuese e krijoi zoti Sali Berisha në vitin 1993 tek Plepat e Durrësit dhe brenda pak muajve ia arriti të edukojë e formojë gati një mijë prokurorë e gjyqtarë të aftë e të ndershëm, të cilët e ngritën nivelin profesional dhe atë etik të sistemit shqiptar të drejtësisë aq lart sa populli shqiptar edhe sot i kujton me mall e respekt hetimet dhe gjykimet e bërë prej tyre tash tridhjetë vjet.

Mirëpo, aleanca jonë e gabuar me vendet perëndimore dhe, veçanërisht, me SHBA-në na solli procesin e Vetingut i cili, padrejtësisht, i largoi nga sistemi thuajse të gjithë këta akademikë të përkushtuar.

Në kuadrin e zhvillimeve të shpejta demokratike, qeveria jonë e nderuar duket se ka menduar seriozisht të themelojë tani Akademinë e Blegtorisë. Unë ndiej keqardhje që gjyshi im i ndjerë nuk e jeton këtë kohë. Ai qe kujdesur për bagëtitë e tij pa studiuar në këtë akademi dhe, madje, pa e dëgjuar ndonjëherë fjalën “akademi”.

Kushedi sa qumësht do të kishin dhënë dhentë e dhitë e tij dhe çfarë mishi do të kishin ngrënë paraardhësit e mi sikur ai ta kishte pasur diplomën e kësaj akademie.

Tani, shkurtimisht ju të dashur aspirantë për t’u bërë akademikë në blegtori duhet të keni parasysh disa gjëra të rëndësishme pasi e ardhmja e vendit varet tek ju. Nuk ka rëndësi nëse keni mbaruar ndonjë shkollë tjetër përpara pranimit në Akademi sepse aty do të merrni dijet dhe kulturën e mjaftueshme shkencore për ta çuar bujqësinë dhe blegtorinë shqiptare në majat më të larta të shkencës dhe arritjeve botërore.

Në fund të fundit, pasi populli shqiptar doli në dritën e demokracisë, tek ne u krijuan me mijëra kuadro të ditur e të aftë të cilët pohonin pa droje dhe me krenari se “diplomën e shkollës së lartë e kam, por mos më pyet për diplomën e shkollës së mesme!”.

Shumë nga këta kanë drejtuar e drejtojnë punët e shtetit shqiptar dhe zgjidhin, si s’ka më mirë, hallet tona ndërsa ju, thjesht do të merreni me bagëtinë, të zgjidhni hallet e tyre dhe, njëkohësisht, nevojat tona ushqimore.

Dijet tuaja shkencore do të përqëndrohen, kryesisht, në ushqyerjen, mjeljen dhe vrasjen (prerjen) e bagëtive. Edhe nëse nuk e mësoni në akademi duhet të keni parasysh se shkenca botërore ka arritur sot nivele shumë të larta.

Ajo ka arritur të prodhojë të tilla ushqime që e rrisin peshën e derrave apo të demave dhjetëra herë brenda pak muajve, si dhe sasinë e qumështit të prodhuar nga lopët, dhentë e dhitë disa herë. Kjo arrihet në sajë të produkteve ushqimore hibride të pasuruar me gjithfarë lëndësh kimike dhe sintetike.

Një gjë e tillë iu sjell fitime të paimagjinueshme prodhueseve dhe mbarështuesve të blegtorisë. E, ç’të keqe ka pse përdoren lëndë kimike dhe sintetike për shtimin e produkteve ushqimore që ne konsumojmë? A nuk jemi ne ata që po krijojmë edhe njerëz me përbërje gjysëm organike, me buzë, gjokse dhe trup gjysëm sintetik dhe pastaj po i admirojmë, shpallim VIP-a e Mise dhe po lëmë kokën mbas tyre në TV, shtyp dhe klube nate ku konsumohet alkool dhe drogë pa hesap?

Duke pasur parasysh studimet e ardhshme në Akademinë e Blegtorisë, ju do të jeni në gjendje të mbarështoni kafshë të cilat do të prodhojnë mish pa hesap, pa shije, por me nivele të lartë përbërësish kimikë dhe artificialë.

Për ta arritur këtë duhet të kujdeseni që edhe produktet ushqyese për kafshët tuaja të mos jenë krejtësisht organike, por të përmbajnë gjithfarë përbërësish që shumëfishojnë prodhimin sepse, në fund të fundit, qëllimi kryesor i mbarështimit të blegtorisë është rritja e prodhimeve dhe fitimi material e financiar.

Pas kësaj ne do të kemi në treg produkte ushqimore dhe mish e peshk ku shkruhet: “organike” dhe “me përbërje kimike dhe artificiale”. Nëse je i pasur do të konsumosh ato me etiketë “organike”, siç bënin dikur parardhësit tanë të varfër dhe analfabetë.

Nëse je aq i pazoti sa të mos jesh i pasur do të konsumosh produkte me lëndë kimike dhe artificiale. Produkteve tuaja blegtorale do iu vihet në etiketa shënimi joshës: “Produkte të Akademisë së Blegtorisë”. E rëndësishme është që do të hash më shumë. Mishi pa shije, lulet pa erë dhe qytetarët e panjerzishëm shkojnë paralel dhe të lumtur.

Bagëtinë duhet t’i trajtoni me humanizëm, t’i ushqeni sipas meritave dhe t’iu siguroni një fund tragjik, por të lavdishëm në mënyrë që të mbeten në histori. Pjesën kryesore të ushqimit ruajeni për lopët sepse japin shumë mish dhe qumësht. Edhe derrat ushqejini mirë dhe me çfarëdo sepse ata nuk kanë shumë pretendime. Duan të hanë shumë dhe pastaj të zhgërryhen në pellgje me ujë të ndotur dhe në baltën që mund të krijoni ju gabimisht.

Për delet ju mjafton bari ndërsa dhive sigurojuni gjeth dhe çdo vit shpallni konkursin e bukurisë ” Miss Dhia me bisht përpjetë “. Për gomerët që punojnë e lodhen shumë dhe për pulat që thjesht bëjnë ndonjë vezë, mos u merakosni fort. Atyre iu jepni çfarë të teprojë nga të tjerat dhe mund t’i konsideroni si ” ndihma sociale “.

Për kafshët e egra si arinjtë, luanët, gjarpërinjt, krokodilat, minjtë etj. krijoni shoqata humanitare dhe miratoni ligje për mbrojtjen e tyre ndërsa këto kafshët shtëpiake që përbëjnë blegtorinë therini dhe mos ua lini vendin gjëkundi sapo të bëhen të dobishme për barkun tuaj, dhe tonin.

Aspekt shumë i rëndësishëm i përgatitjes tuaj blegtorale do të jetë edhe teknologjia dhe procesi i mjeljes. Sa i përket mjeljes, ne shqiptarët kemi prirje dhe aftësi të veçanta, të cilat i kemi shfaqur historikisht, ndërsa në këto dekadat e fundit i kemi shtrirë edhe në mjeljen e njëri-tjetrit.

Duhet të keni parasysh që mjelja të jetë e shpejtë dhe e plotë dhe duhen mjelur më fort dhe më mirë bagëtitë më të dobëta, ato që ushqehen më pak dhe më keq. Në këtë mënyrë, pasi të mbani diplomat e akademistëve dhe të jeni perfeksionuar në procesin e mjeljeve, ju do të bëheni të denjë dhe ne do t’ju zgjedhim si paralamentarë dhe drejtues të institucioneve shtetërore.

Aty do të vazhdoni me zotësi procesin e mjeljes dhe do të ndaheni në grupe që garojnë dhe luftojnë me njëri-tjetrin se kush mjel më shumë, më mirë dhe më shpejt, gjithnjë në shërbim dhe në të mirën e bagëtive që përfaqsoni dhe iu shërbeni.

Tufat e bagëtive do të ndjekin nga pas barinjt e tyre dhe do të ndeshen me njëra-tjetrën për të përcaktuar bariun më të mirë e më të zot, atë që premton më shumë ushqyerje, kullotje dhe strehim për bagëtinë.

Me çeljen dhe funksionimin e Akademisë së Blegtorisë, më pas asaj të Peshkimit, të Gjuetisë e kështu me radhë, do të bëhen të panevojshme Akademitë e Shkencave, Arteve, Ushtarake e të tjera krijesa arkaike. Kur të qeverisemi nga akademikët blegtoralë ne do të jemi kombi më i lumtur në botë dhe gjithë diaspora shqiptare do të kthehet në atdhe.

Termat e mëdhenj që përdor shpesh politika për veprimtari të vogla dhe synime të mëdha kanë rëndësi jetike për shoqërinë njerëzore. Edhe në mos sjellshin rezultate të mëdha, është e sigurt se shkaktojnë iluzione dhe qeshje pa fund.

Viktor Malaj