Task-forca e prokurorisë mbyll hetimet ndaj të pandehurit Kastriot Ismailaj, i akuzuar për pastrim të parave dhe mashtrim me pasoja të rënda, që i ka sjell shtetit një dëm prej 4.6 milion euro.
Këtë shumë, kompania e Ismailajt DIA e ka përfituar me anë të mashtrimit nga kompania çeke CEZ shpërndarja, ku shteti shqiptar ishte aksioner me 26 % të kuotave. Sipas akuzës, Ismailaj duke përdorur të dhëna të rreme dhe dokumente të falsifikuara apo fiktive ka arritur të vjedhë nga llogaritë e shoqërisë çeke shumën prej rreth 4.6 mln euro.
Kjo shumë, i ka kaluar kompanisë së Ismailajt me ndihmën e ish-përfaqësuesit të kompanisë çeke në Shqipëri, Josef Hejcek për të cilin është veçuar hetimi për akuzën e mashtrimit. Sipas prokurorisë, këto para Ismailaj i ka përvetësuar duke krijuar një kompani me emrin DIA, me të cilën ka firmosur një kontratë dy vjeçar me kompaninë CEZ me objekt mbledhjen e borxheve dhe kamatat të debitorëve që kanë kaluar afatin prej 90 ditësh. Prokurorët thonë se pavarësisht marrëveshjes Kastriot Ismailaj, nuk ka mbledhur borxhet e CEZ-it dhe as ka kryer ndonjë pune reale, por ka përfituar shumën prej 4.6 mln euro me dokumente fiktive.
Sipas prokurorisë, shumën e përfituar nga kompania CEZ Shpërndarja, i pandehuri Ismailaj e ka investuar në kompani të tjera në Shqipëri, duke konsumuar kështu akuzën e pastrimit të parave. Këtë vepër, prokuroria pretendon se e ka kryer edhe me krijimin e 5 kompanive të tjera tregtare, me anë të cilave ka kryer transaksione të mëdha parash, që dyshohet se kanë burime kriminale.
Ky dyshim, është ngritur pasi në të gjitha transaksionet e kryera nuk kishte dokumente shoqëruese për origjinën e parave apo një dokument mbulues e justifikues për arsyen e ardhjes në Shqipëri. Nga verifikimi i kryer, rezulton se brenda një periudhe të shkurtër në llogarit e tij bankare, kanë ardhur deri në 12 mln euro. Që më pas, një pjesë e konsiderueshme e saj është transferuar drejt vendeve të njohur si parajsa fiskale apo në vendet afrikane.
Prokuroria, ka provuar se në të gjitha këto raste, kompanitë e Ismailajt në Shqipëri nuk kishin aktivitet tregtar të deklaruar. Sipas akuzës, në llogarit bankare të Ismailajt, tashmë janë bllokuar vetëm një shumë prej rreth 5 mln euro, e që rezultojnë se kanë ardhur në Shqipëri nga Zvicra dhe Shtetet e Bashkuara të Amerikës, shkruan Abc News.
Burimet thanë ka qenë vet prokurorja Antoneta Sevdari, e cila i ka komunikuar akuzat Kastriot Ismailajt në dhomat e paraburgimit “Mine Peza”, ku i pandehuri i ka mohuar ato. Para prokurores, ai nuk ka pranuar të jap shpjegime për akuzat duke pretenduar se do të flas para togave të zeza, gjatë fazës së gjykimit.