Rama: Asnjë dyshim, 30 qershori ditë zgjedhjesh me standarte

Kryesia e Partisë Socialiste është mbledhur mëngjesin e sotëm dhe në fokus ka qenë fushata dhe zgjedhjet e 30 qershorit.

Kryeministri Edi Rama ka dhënë porosi të veçanta për mbarëvajtjen e procesit zgjedhor, duke nisur nga ditët e mbetura të fushatës deri ditën e zgjedhjeve.

Rama ka kërkuar të dokumentohet çdo incident i mundshëm gjatë ditës së zgjedhjeve dhe sipas tij nuk ka asnjë dyshim se më 30 qershor do të ketë votime.

Kryeministri ka vendosur që mitingu përmbyllës i fushatës elektorale të mbahet në qytetin e Vlorës, ku vetë Rama është deputet.

“Më 30 qershor të kemi një proces me standarde“, është shprehur Rama në mbledhjen e kryesisë.

Sa i përket garantimit dhe mbarëvajtjes së procesit zgjedhor, kryesocialisti ka kërkuar të respektohet Kodi Zgjedhor, ndërsa sa i përket tentativave nga opozita joparlamentare për të penguar procesin, ka kujtuar edhe një herë ndëshkimet ligjore që ndërmerren: Burg, përjashtim nga Administrata dhe ndalim deri në 10 vjet për të dalë jashtë Shqipërie, në SHBA dhe vendet e BE-së, siç Rama paralajmëroi dje nga takimi elektoral në Gjirokastër.

Këto janë ndryshime në Kodin Penal që ende nuk kanë marrë votën e Kuvendit.

“Të dokumentohet çdo incident i mundshëm gjatë ditës së zgjedhjeve. Të garantohet mbarëvajtja e procesit zgjedhor. Të jemi korrekt me procesin e administrimit zgjedhor. Të respektohet kodi zgjedhor. Kush prek votën dhe manipulon votën, do përgjigjet para ligjit”, ka deklaruar gjithsesi Rama.

e.t./dita