12 familje rrezikojnë të dalin në rrugë, pasi GJykata e Tiranës dha dhënë urdhër-ekzekutimin për lirimin e ndërtesës ky jetojnë. Familjet e pastreha jetojnë në ish-çerdhen nr.36, tek ish-Fusha e Zezë. Ata protestojnë kundër vendimit për t’i nxjerrë nga ndërtesa dhe shprehen se dokumentet gjatë procesit janë falsifikuar. Ata thonë se nuk dalin gjallë nga banesat, pasi nuk kanë ku të shkojnë.
“Ky objekt nuk është pjesë e aktit normativ të nxjerrë nga qeveria duket qartë se po bëhet falsifikim kundër dekumentacionit. Jemi dhe do veprojmë në bazë të ligjit. Nëse dikush është pronar ikim vetë nga këtu”, tha një prej banorëve për televizionin Neës24.
Dymbëdhjetë familjet e mësipërme jetojnë prej 20 vitesh në ndërtesën, e cila me vendim të gjykatës do t’u kthehet ish-pronarëve.
Në mbështetje të tyre ka dalë edhe deputetja socialiste, Vasilika Hysi, e cila bëri apel që këta njerëz të mos flaken në rrugë.
“Ligji është ligj, akti normativ është akt normativ, por krahas saj është edhe aspekti human. Këta banorë nuk mund të flakën në rrugët. Ndaj në kushtet ku këta qytetarë nuk kanë të drejtë të përfitojnë shtëpi, kjo gjendje nuk duhet toleruar. Unë nuk vij për politikë. Këta banorë duhet të qëndrojnë në shtëpitë e tyre”, theksoi Hysi.
AP: Qeveria zgjidhi emergjencën e ish-pronarëve, la në emergjencë banorët
Avokati i Popullit ka nisur një hetim për situatën e krijuar pas aktit normativ të qeverisë, i cili i detyron banorët e disa banesave të dalin në rrugë, pasi ndërtesa do t’u kthehet ish-pronarëve.
“Akti normativ i qeverisë zgjidhi emergjencën e ish-pronarëve, por la në gjendje shumë emergjente banorët që jetonin në këto banesa”, thuhet në deklaratën e AP.
Ky institucion bën të ditur se e ka paralajmëruar që më përpara situatën që do të krijonte akti normativ, ndërsa shton se menjëherë pas hyrjes së tij në fuqi, ”numri i ankesave ka ardhur në rritje, janë 50-60 ankesa individuale apo peticione”.
AP bën të ditur se duke parë situatën e krijuar, ka nisur një hetim të përgjithshëm, por nuk ka gjetur bashkëpunimin e institucioneve përgjegjëse.