Komunistët: Perversët si Vasfiu e Fevziu sulmojnë Enverin

Akuzat e Vasfi Barutit në një libër të kohëve të fundit se Enver Hoxha ishte imoral dhe kur ka qenë mësues në lice ngacmonte seksualisht nxënëset dhe shkonte me gratë e shtëpive publike, hidhen poshtë nga kreu i komunstëve shqiptarë, Muharrem Xhafa. Ai e quan Barutin një shërbetor të Fevziut, i cili e ka quajtur Enverin homoseksual. Ndërkaq, Xhafa argumenton se Enveri nuk ka qenë spiun i Ahmet Zogut. Në këtë intervistë për gazetën ‘DITA’ ai tregon pse sulmohet herë pas here Enver Hoxha dhe figura të tjera kombëtare si Skënderbeu, Ismail Qemali e deri tek Ramush Haradinaj…

– Zoti Xhafa, a jeni njohur me librin “Enver Hoxha në një optikë të re” me autor Dr. Vasfi Barutin, publikuar tani së fundi?

– Jo, nuk e kam lexuar akoma librin e zotit Baruti, por jam njohur përmes gazetës “Panorama” me disa pjesë të librit, ku bëhen përpjekje për të bindur opinionin publik se diploma me notat e Enver Hoxhës është e falsifikuar, se Enveri është pushuar nga puna si mësues, “sepse pati marrëdhënie intime me nxcënëset e Liceut” dhe se ai ka qenë”agjent i Ahmet Zogut”

– Cili është mendimi juaj për këto që thuhen, fjala vjen për ato që thotë zoti Baruti se Enveri ishte qejfli femrash, ndërsa Fevziu e ka quajtur Enverin homoseksual?

– Së pari, duhet bërë e qartë për lexuesin se zoti Baruti nuk është i pari që hedh baltë dhe shpif për Enver Hoxhën dhe se ky, pra Baruti, deri dje mësues i marksizëm leninizmit ecën në rrugën e sahanlëpirësve të tjerë, si Fevziu, për të denigruar figurën e Enver Hoxhës. Madje ka një garë të fëlliqur. Së dyti, duhet t’i them opinionit shoqëror se me ç’kam parë deri më tani, Baruti nuk sjell asgjë të re në librin e tij të turpit, jo për gjë tjetër, po sepse nuk ka se ku të gjejë gjëra të reja për të komprometuar Enver Hoxhën në rininë e tij. Së treti, më vjen keq për gazetën ‘Panorama’, e cila, duke botuar Barutin apo të tjerë si ky, i bën dëm vetes. Ajo shkruan se Baruti me librin e tij të ri tenton të mbushë boshllëqet me fakte dhe materiale të reja e në mungesë të tyre bën ‘përqasje rrëfimesh”. Dhe më tej: “Siç kuptohet dhe nga titulli, gjithçka në këtë libër vjen në një këndvështrim të ri”. Cili është këndvështrimi i ri i Barutit? Pse, njëherë janë thënë për Enver Hoxhën shpifje të ndyra si këto që Baruti hedh në librin e tij? Lexoni Fevziun dhe Fevzinjtë e tjerë dhe do të bindeni se Baruti është një shërbetor i Fevziut dhe nga ata intelektualë që e kanë mizën nën kësulë, të cilët kërkojnë të bëhen miq të pushtetit të borgjezisë, duke hedhur gurë mbi lavdinë e kombit, Enver Hoxhën. Së katërti, Baruti me shokët e vet shpresojnë se duke sjellë disa “përqasje rrëfimesh” si ato të Panajot Plakut, synon t’u mbushë mendjen njerëzve se në rininë e tij Enver Hoxha paska qenë një ngacmues vajzash. Dhe kë sjell Baruti për të dëshmuar mbi imoralitin e Enver Hoxhës?! Sjell Panajot Plakun. Panajot Plaku u arratis në Jugosllavi, sepse ishte në shërbim të jugosllavëve, të rusëve e të tjerëve. Ai sa ishte kuadër i lartë i partisë, i shtetit dhe i ushtrisë shqiptare nuk tha kurrë ndonjë gjë të keqe kundër Enverit. Kur pra foli Panajoti? Pasi u arratis në Jugosllavi si tradhtar i atdheut. Një shqiptar realist nuk mund t’u besojë gënjeshtrave të tilla të Barutit. Populli shqiptar është i mençur dhe nuk i ha broçkullat se “Enver Hoxha përjashtohet nga shkolla se kishte lidhur me nxënëset e tij marrëdhënie të palejueshme”. Në të vërtetë, edhe kjo thënie nuk i përket Panajot Plakut, po, siç thotë Baruti, Pavël Goraniçit. Baruti shkruan se “E vërteta e Panajot Plakut kryqëzohet me studiuesin Pavël Goraniç”. Ç’është kjo prirje antikombëtare e disa intelektualëve shqiptarë, që, për interesa të pista të tyre, mburrin serbët dhe shajnë shqiptarët?! Këtë bëri edhe Fatos Lubonja para disa ditësh, kur, në një shkrim të tij, i quante shqiptarët skizofrenikë dhe akuzonte Ramush Haradinajn si kriminel, ndërkohë që Haga e shpalli të pafajshëm. Si ta konsiderojmë këtë Lubonjën që shan dhe fyen bashkëkombasit e tij për t’u mbuluar me lavde nga serbët? Shqiptarët e vërtetë ndiejnë neveri nga kjo sjellje e Lubonjës. Këtë punë bëjnë edhe Vasfi Baruti, Fevziu e të tjerë si ata…

– Po në lidhje me ato që thotë Baruti se “Enveri ishte agjent sekret i Zogut, cili është komenti juaj?

– Kjo është njësoj sikur unë të them se Baruti ka qenë agjent sekret i Enver Hoxhës. Enver Hoxha “për shumë vite studimi mbahej me franga ari nga qeveria e Zogut”, thotë Baruti i lagur. Sipas tij për këtë arsye Enveri na paska qenë agjent i Ahmet Zogut. Po Vasfiu, a nuk studioi në Universitetin e Enver Hoxhës, a nuk shkroi sa e sa artikuj ku mburrte e ngrinte në qiell Enverin dhe filozofinë e tij? A nuk është Baruti bashkautor i librave për filozofinë e Enver Hoxhës? Nuk gjykohen gjërat kështu , zotërinj të borgjezisë! Ahmet Zogu, ndonëse vdiq pasi në Shqipëri ishte vendosur pushteti popullor dhe pasi dështoi jo një herë në përpjekjet e tij për të rrëzuar me ndihmën e agjenturave të huaja regjimin e Enver Hoxhës, nuk tha ndonjëherë se Enver Hoxha kishte qenë agjent i tij. Sigurisht ai nuk tha kështu, sepse Enveri nuk kishte qenë kurrë në shërbim të mbretit Zog, por edhe sepse, ishte si ishte Ahmet Zogu, nuk e lëshonte veten të binte në pozitat që bien sot disa sharlatanë të borgjezisë, të cilët, kur t’u hapen dosjet, do të ndjehen keq ose do t’ia mbathin nga Shqipëria.

Sepse, disa të ashtuquajtur intelektualë kaq të trashë janë apo bëjnë lojën e budallait, ndërsa ushqejnë shpresa se mos bashkatdhetarët e tyre do të dëgjojnë dhe do të marrin si të vërteta ato që servir Baruti për Panajot Plakun ose Nesti Konomin. Baruti thotë se Nesti Konomi, paska thënë, që në vitin 1930, se ai paskej pasur shoqëri të ngushtë me Enver Hoxhën dhe se Enveri i paskej treguar të gjitha pisllëqet e tij me gratë e shtëpive publikë të Korçës. Përse zoti Baruti nuk sjell për të dëshmuar me gojë ose me shkrim thëniet e grave të shtëpive publike të Korçës ose të ish nxënëseve të Liceut të Korçës apo të Gjirokastrës po deshe, që Enver Hoxha u paskej rënë në qafë ose i kishte ngacmuar seksualisht?! Nëse Baruti do të gjejë ndonjë të tillë, dhe do t’ia mbushë mendjen të flasë sot pas 80 apo 90 vjetësh, unë do ta pyesja zonjën : Përse zonjë nuk folët në kohën kur Enveri të ngacmoi seksualisht, por flet sot pasi ai ka vdekur? Pse nuk folët kur Enveri ishte djalë i ri, dhe nuk ishte as drejtor shkolle, as udhëheqës, siç u bë pas çlirimit? Sa je paguar dhe kush të ka paguar? Baruti duhet ta dijë se Enver Hoxhën e kanë akuzuar për “pervers” përversët e ditëve të sotme, që janë të shumtë dhe turpi i popullit shqiptar.

– Po në lidhje me çfarë shkruan Vasfi Baruti për arsyet e pushimit nga puna të Enver Hoxhës, cili është mendimi juaj?

– Synimi i Barutit është që të bindë ata që mund t’i hanë gënjeshtrat e tij se Enver Hoxha nuk është pushuar nga puna për veprimtari antifashiste, se Enveri nuk ishte element kundër regjimit fashist dhe se ai u la jashtë kuadrit si mësues, mbasi nuk shihej nevoja e mbajtjes së tij si profesor. Baruti citon tekstin e vendimit të pushimit nga puna të Enver Hoxhës. Ja ç thuhet: “Vendim. Ministria e Arsimit. Nr. 6621/4x. Tiranë, 13.11. 1939. Gjimnazit të Gjirokastrës. Shkurtimi: Ju njoftohet se Z. Enver Hoxha, mësues i transferuar aty prej liceut të Korçës, shkarkohet nga detyra dhe mbetet jashtë kuadrit, pasi nuk shihet nevoja e mbajtjes së tij në shërbim. Ministri. Drejtorisë së Liceut Korçë”. Baruti arrin në konkluzionin se transferimi i Enverit është bërë për shkak se ngacmonte seksualisht vajzat e Liceut, ndonëse vendimi i Ministrit të Arsimit të regjimit fashist nuk e zë fare në gojë një gjë të tillë. Mirë, mirë, thotë Baruti, nuk e thotë Ministri i fashizmit, por e thotë Baruti i Saliut. Nuk e kuptoj, pse kanë kaq simpati për fashizmin dhe i dalin në mbrojtje disa intelektualë shqiptarë, përse i urrejnë aq shumë antifashistët, ata që bënë luftën dhe fituan mbi fashizmin të udhëhequr nga Komandanti i Përgjithshëm, Enver Hoxha.

– Pse dalin pikërisht tani gjëra të tilla dhe kujt i interesojnë?

– Nuk ka asgjë për t’u çuditur. Servilë dhe shërbetorë të pështirë do të ketë përherë. Edhe koha kur dalin gjëra të tilla nuk është rastësi. Tani për shembull, jemi pas zgjedhjeve të 23 qershorit, kur populli rrëzoi me votë plebishitare regjimin e mbrapshtë antipopullor të Sali Berishës. Jemi në një periudhë transitore të marrjes së pushtetit nga maxhoranca e re. Populli ka shumë halle probleme. Ndaj dhe ngrihen disa si Baruti dhe tregon përralla për Enverin të para 90 vjetëve! Që të harrohen hallet dhe problemet e sotme. Kjo është taktika e Sali Berishës. Shikoni se kush sulmohet dhe si sulmohet: sulmohet Enveri, Skënderbeu, Ismail Qemali… Por duke sulmuar këto figura, ata sulmojnë simbolet e kombit. Bota heronjtë i ka në panteon dhe nuk lejon t’i përbaltë askush.  Partia e Punës e Shqipërisë është në mbrojtje të këtyre simboleve të kombit.