Ligji që u propagandua me bujë në lidhje me lejet e qëndrimit dhe nënshtetësinë duket se do të fillojë të zbatohet jo më parë se prill 2016!
Eksperti i çështjeve të emigracionit dhe drejtuesi i organizatës “ArogjiPërkrahje”, Fatos Malaj, thotë se vonesa i dedikohet faktit se ende nuk është gati sistemi elektronik i Ministrisë së Brendshme, sistem në të cilin duhet të kalojnë detyrimisht gjithë të dhënat dhe procedurat.
Autoritetet kompetente greke kanë kontraktuar një firmë të re për ndërtimin e sistemit, dhe kontrata parashikon që ky sistem do të jetë gati në prill të vitit të ardhshëm. “Tribunanews”, raporton se përfituesit nga ligji i ri (4332/15), do të duhet të presin edhe shtatë muaj të tjerë, vetëm që të shkojnë e të paraqesin aplikimet!
Kujtojmë se nga dispozitat e ligjit të ri përfitojnë: – Brezi i dytë që i mundësohet marrja e nënshtetësisë greke; – Nënat që kanë lindur fëmijë në Greqi dhe që sipas ligjit të ri mund ta marrin direkt lëeje qëndrimi për bashkim familjar; – Një numër jashtëzakonisht i madh emigrantësh që ose nuk kanë patur kurrë leje qëndrimi, ose e humbën atë për shkak të krizës. Kuptohet se çdo vonesë në zbatimin e ligjit, vë në një pozitë mjaft të vështirë sidomos këtë kategori të fundit, e cila mund të përballet nga momenti në moment me largimin nga Greqia.