Pjekuria e hershme seksuale, rreziqet që vijnë prej saj

Autoritetet shëndetësore po përballen çdo ditë e më tepër me një numër të lartë të rinjsh, që si rrjedhojë e nisjes së hershme të aktivitetit seksual manifestojnë probleme të shumta shëndetësore. Duke iu referuar të dhënave të raportuara, vërehet një ulje e kufirit të moshës në të cilën të rinjtë shqiptarë kryejnë marrëdhënien e parë seksuale. Në këtë drejtim, specialistët pohojnë se mosha e nisjes së aktiviteti seksual ka zbritur deri në 12 apo 13 vjeç. Por, ajo çfarë konsiderohet edhe si më shqetësues mbetet fakti i neglizhencës së prindërve kundrejt informimit të fëmijëve hap pas hapi, mbi rreziqet që u kanosen nga nisja e hershme e aktivitetit seksual. Sipas autoriteteve shëndetësore, nisja e jetës seksuale që në moshë 13 apo 14 vjeç, apo dhe në moshë më të vogël, mund të mbartë probleme të shumta në rritjen e mëtejshme, pasi ndikon në shfaqjen e çrregullimeve të rënda psikologjike, që evidentohen me kalimin e kohës. Situata më problematike rezulton të jetë në kryeqytet, por nuk mbeten pas as rrethet. Tashmë të rinjtë shqiptarë janë të ekspozuar ndaj marrëdhënieve seksuale që në vitin e parë të gjimnazit (madje tani me ndryshimin e strukturës  arsimore vërehen raste sporadike edhe në arsimin e detyruar tek nxënës të klasave të teta apo të nënta). Lidhur me këtë problematikë, punonjësit socialë dhe psikologët kanë kërkuar që të ndërhyhet në zbutjen e këtij fenomeni dhe pasojave që lë në mënyrë të menjëhershme te formimi dhe rritja e këtyre grupmoshave. Ndërhyrje, e cila duhet të pasqyrohet edhe në kurrikulat shkollore me udhëzime specifike. Veprime të tilla ndikojnë më pas në shfaqjen e një jetë sociale të paqëndrueshme, si dhe karrierë të dobët, që përjetohet nga të rinjtë, çka dërgon në shfaqjen e traumave psikike që përjeton kjo kategori, pasojat e së cilës vinë duke u bërë gjithnjë e më të dukshme me kalimin e kohës. Kundrejt kësaj problematike shqetësuese shfaqet edhe marrja e informacioneve të duhura mbi metodat kontraceptive të mbrojtjes. Kjo kategori me kalimin e viteve bie pre e një sërë sëmundjesh, veçanërisht infeksioneve që prekin rrugët gjenitale. Nisja e hershme e aktivitete seksual mund ti dëmtojë rëndë të rinjtë, pasi ata bien viktima të një sërë sëmundjeve infeksioniste, të cilat shpesh herë neglizhohen dhe zbulohen më pas në stade të rënduara, kohë në të cilën ndërhyrja trajtuese mund të mos japë efektet e duhura. Specialistët argumentojnë se të rinjtë të këtë moshë nuk janë ende të ndërgjegjshëm siç duhet për rreziqet që u kanosen. Si rrjedhojë e këtyre neglizhimeve një ndër më problematiket mbetet edhe kanceri i qafës së mitrës. Gjithashtu mungesa e informacioneve mbi përdorimin e metodave kontraceptive po bëhet shkak për shtimin e shtatzënive të padëshiruara, që përfundojnë drejt abortit. Fatkeqësisht gjatë viteve të fundit numri i aborteve që kryhen pranë materniteteve ka ardhur gjithnjë e më shumë në rritje, duke shtuar shkallën e rrezikshmërisë shëndetësore që u kanoset të rinjve. Ndonëse të dhënat e deklaruara janë të pjesshme, pasi në masë ky aktivitet nuk raportohet, rezulton se në rreth 1 mijë lindje llogariten të kryhen rreth 300 aborte, ku një pjesë e konsiderueshme e tyre kryhen nga vajza fare të reja në moshë. Komplikacionet shëndetësore me të cilat përballen femrat që kryejnë aborte janë nga më të shumtat, duke nisur nga ato fizike e deri tek trauma psikologjike. Studimet kanë treguar se gratë që kanë bërë abort mund të kenë probleme edhe me shtatzënitë e ardhshme. Madje, ato mund të mbeten edhe sterile. Këtu nuk duhen përjashtuar rrisqet më të larta për një sërë infeksionesh. Të dhënat dëshmojnë se gratë që kanë bërë abort në shtatzënitë e ardhshme mund të presin vështirësi si lindja e parakohshme dhe pesha e vogël e bebes.