Plaçka e pushtetit vë në lëvizje politikën tonë…

Pse pozitë dhe opozitë,
janë kaq thell’ në armiqësi?
dhe s’bën dot një hap përpara,
hallemadhja Shqipëri?

Pa frikë fare mund të them,
një qëllim kanë sot të tërë,
pushteti më shumë u duhet,
plaçkë e pare për të bërë!

Për parime s’konkurrojnë,
për modernizim të shtetit,
por si grabitqarë shikojnë,
plaçkën që vjen prej pushtetit

Sot një opozitë e egër,
në një sulm frontal është hedhur,
se pushtetin-që u iku,
e kuptojnë si plaçk’ të vjedhur!

Për psikozën e kusarit,
mua top më ësht’ bërë bindja,
duan t’u rikthehet plaçka,
që ua ka marrë “Rilindja”!

Ndaj nga mëngjesi në darkë,
e nga darka gjer në drekë,
nëntëdhjetë për qind të kohës,
flasin për prona e për lekë!

I lëpijnë buzët si mackë,
edhe flasin me furi,
kanë frikë se s’do ketë më plaçkë,
kur të kthehen përsëri!

Dhe “Rilindja” që votuam,
dhe po qeveris tani,
duket që është shumë e zënë,
për të vënë ca pasuri!

“Rilindja” që qe betuar,
për ndëshkimin e hajdutit,
ndoqi-shumë pa u menduar,
vjedhje-metodat e SHQUP-it!

Sala që i njeh gjith’ zgëqet,
ka folur me mijëra herë,
e di si bëhen pisllëqet,
ndaj është bërë helm e vrerë!

Ndonjërit që s’është në temë,
mund t’i duket budalla,
kur thotë: “Këtë e di mirë,
kjo punë s’bëhet pa para!”

Për Salën ju garantoj,
shumë vjet e mbajti pushtetin,
dhe i di gjithë formulat,
se si mund ta rrjepësh shtetin!

Dhe për plaçkën-veç për plaçkën,
bën si ujk i egërsuar,
se shumë shpejt-këta që erdhën,
formulat ja kanë mësuar!

Ulëret ujk’ i tërbuar,
nga mëngjesi gjer në darkë,
se ai e di shumë mirë,
se si lëviz çdo qindarkë!

Ulëret e s’lodhet kurrë,
merr fuqi nga babëzia,
se çdo lek që këtu vidhet,
i duket si leku tija!

Këta që janë në pushtet,
s’i kam parë të ulërasin,
sa kohë që janë në mes plaçkës,
mendjen s’kanë pse ta vrasin!

Nuk bërtasin kot më kot,
s’i hanë fjalët nëpër dhëmbë,
në ikshin-do ikin plot,
dhe gjemb s’do t’u hyj në këmbë!

Plaçka-plaçka e pushtetit,
veç ajo ka rëndësi,
ndaj Reforma kryesore,
mbeti një demagogji!