Opozita kërkon sqarime në lidhje me planin e ri rregullues të kryeqytetit, i paraqitur nga Bashkia e Tiranës. Anëtari i Asamblesë së Partisë Socialiste, Artan Lame, tha se ky plan do t’i marrë Tiranës të gjitha hapësirat e blerta, për t’i kthyer ato në sheshe ndërtimi.
“Gjelbërimi tani mbetet vetëm në bahçet e shtëpisë dhe në tarracat e pallateve,” tha Lame. Ai ftoi kryebashkiakun Basha dhe dhëndrin e Berishës, Jamarbër Malltezi, në një debat televiziv për planin rregullues të Tiranës. Malltezi ka bërë vlerësimin mjedisor të planit.
“Kërkojmë një përgjigje nga ekipi Basha – Malltezi: a do të zihen dy skarpatet e gjelbra të Lanës për të ndërtuar linjën e tramvajit? Jemi të shqetësuar për hapësirat e gjelbra që do t’i zihen Tiranës nga Plani Basha – Malltezi, ndaj pyesim a është e vërtetë se dy skarpatet e gjelbra të Lanës do të zihen nga linja e tramvajit? A është e vërtetë se si zona të gjelbëruara do të përdoren bahçet e shtëpive, e thënë jo kopshtet, por bahçet? A është e vërtetë se parku historik i Tiranës, ai i Namazgjasë, përpara Parlamentit e deri buzë Lanës do të zihet nga ndërtimet e larta? Për të gjitha pyetjet tona ne jemi të gatshëm të ulemi të debatojmë në cilindo televizion e cilëndo media me ekipin Basha – Malltezi për t’u treguar qytetarëve se çfarë sëpate po ngrihet mbi kryeqytetin tonë”, tha Lame.