Po dhe kësaj here s’do ndodhin çudira!

Arben Duka

Kësaj radhe zgjedhjet,
do jenë shumë të mira,
po më pas mos prisni,
të bëhen çudira!

Nuk do ndodhë çudia,
as këtë Qershor,
se në fakt Bashkia,
nuk ka shumë në dorë!

Vërtet më të madhe,
do kemi Bashkinë,
por ajo fuqi,
s’ka mbi energjinë!

Kur dikush ju thotë,
do ta ulim çmimin,
pa turp ju gënjen,
dhe thellon mashtrimin!

Kush thotë-“Punësoj,
një për çdo shtëpi!”,
as e ka idenë,
se ç’bën një Bashki!

Thjeshtë është firaun,
apo firaune,
se nuk mund Bashkia,
të hapë vende pune!

S’hap dot vende pune,
se s’ka hapur kurrë,
po unë gënjeshtarët,
si zë dot me gurë!

Dhe bashkitë e reja,
s’e them badiava,
do kenë për taksat,
sherre të mëdha!

S’e ka thënë as Luli,
biles as i Gjati:
“Taksat e qytetit,
do t’i ketë dhe fshati?!”

Do të kenë shumë taksa,
që tani s’i kanë,
se tash dhe Shën Gjergji,
do quhet Tiranë!

Këtë temë të nxehtë,
askush s’e ka kapur,
ndaj dhe do mbetet,
një debat i hapur!

Po pyes Erionin,
dhe doktor Halimin,
a do marrë në pyje,
taksë për gjelbërimin?

Dhe nuk është problemi,
vetëm në Tiranë,
se me qindra fshatra,
nëpër pyje janë!

Fshatrat nëpër male,
tani pas bashkimit,
a duhet ta japin,
taksën e pastrimit?!

Ç’marrëdhënie të reja,
do kenë me bashkinë,
njerëzit që votojnë,
duhet që t’i dinë!

Bashkitë e reja,
janë konglomerat,
papritur qytet,
s’bëhet dot një fshat!

Fshati me qytetin,
kanë shumë ndryshime,
ndaj do kemi shumë,
eksperimentime!

Të gjithë kandidatët,
vijnë me stekën lartë,
por them-as ata,
nuk e kanë të qartë!