Po e tha ky, del gjithmonë

Kastriot Islami, ish-zyrtari i lartë i PS-së, sot deputet i PD-së thotë se regjimit oligarkik të Ramës po i vjen fundi. Sipas tij kryeministri do të bëjë kurban partnerin e tij qeverisës, Ilir Meta. Islami nënvizon se marrëdhëniet mes Ramës dhe Metës janë të tensionuara. Më poshtë shënimi i tij i plotë në Facebook.

“Regjimi oligarkik i Ramës do të çrrënjoset çfarëdo që të bëjë e sado të përpiqet Rama për ta shmangur. Procesi i “de-oligarkizimit” sapo ka nisur me dekriminalizimin, që është faza më e lehtë dhe më e thjeshtë. Në parlamentin e ardhshëm s’do të mund të ketë asnjë oligark dhe as përfaqësues të oligarkisë. Kjo e shqetëson shumë drejtuesin e oligarkisë, Edi Ramën, i cili ka kohë që mendon të kthehet nga “konceptues, programues, realizues e përfitues” i oligarkisë në “luftëtar kundër oligarkisë”.

Dhe që të jetë i besueshëm i duhet të bëjë kurban Metën… Ky është edhe thelbi i tensionimit të marrëdhënieve midis Ramës e Metës, të cilat zor se do të gjejnë qetësi të qëndrueshme, pavarësisht ndonjë tërheqje taktike të Ramës nga sulmi që ka programuar; marrëdhënie të cilat do të çojnë në çarjen e koalicionit…” shkruan profet Islami në FB. Dhe ky ka treguar se të gjitha hesapet që ka bërë, i kanë dalë…