Po na neveriten ekranet e televizorëve

Flitet se fiset arabe, kur pushtuan Egjiptin, në shek. VII pas erës sonë, e dogjën bibliotekën e famshme të Aleksandrisë, ku ndodheshin kryeveprat e të gjithë autorëve të lashtësisë, me pretekstin se, të gjitha ato libra nuk duheshin, pasi gjithçka që i duhej njerëzimit të dinte, ishte e shkruar në librin e Kuranit. Nuk e di sa e vërtetë është kjo, por e kam menduar gjithmonë dhe sidomos nuk po më hiqet nga mendja këto kohët e fundit teksa shoh e dëgjoj disa “analistë”, të cilët na binë nëpër ekrane gjatë gjithë ditës duke na dhënë mend nga ajo e tyrja që ata “e kanë” me tepri.

Në këtë mori, (një shoku im e quan lukuni, por unë nuk ndaj të njëjtin mendim me të) analistësh spikat veçanërisht z.Fatos Lubonja, të cilin dikush e quan ish-bllokmen, dikush ish-të persekutuar politik. Mua këto epitete, sigurisht, që nuk më duhen. Mua më intereson Lubonja “enciklopedist”. Habitem, në radhë të parë, me aftësitë dhe dëshirën e tij të diskutojë, madje të mëtojë të thotë fjalën e fundit, për të gjitha degët e shkencave, duke filluar që nga gjinekologjia (ndonëse…) tek mineralogjia, nga ihtiologjia tek kozmologjia e të gjitha “logjiat” e tjera.

Veçanërisht dallohet në shkencën e politollafologjisë. Këtë e dëshmoi edhe kohët e fundit kur fajësoi mbarë e prapë të gjithë, deri edhe Amerikën, e cila “kishte pasur paturpësinë” që nuk e kishte pyetur atë, në se duhej të shkatërroheshin armët kimike dhe ku duhej të shkatërroheshin, pasi ai, me siguri, si njeri enciklopedist që është, do t’i jepte këshillën e duhur. Duke perifrazuar thënien e mësipërme, ndonëse nuk jam “opinionisto-analist”, desha të jepja mendimin që, askush tjetër të mos flasë më, pasi e kemi mjaft Tosin.

E di që këto radhë do ta trazojnë z.Lubonja, por në vend që të fillojë të keqpërdorë mediat “e tij” kundër meje, bën mirë t’ia verë gishtin kokës e të mos na “çajë dërrasat” në çdo ekran dhe çdo ditë. Po na neveriten ekranet e televizorëve.