Posterat e partive, bashkia lë afat 24 orë

Bashkia e Tiranës u lë afat vetëm 24 orë subjekteve politike që të pastrojnë kryeqytetin nga çdo poster, banderolë apo reklamim kandidatësh, të cilët ishin pjesë e procesit të zgjedhjeve të 21 qershorit. Bashkia e kryeqytetit, duke kujtuar ligjin, ka paralajmëruar dhe për gjobitje në rast të moszbatimit të këtij urdhri.

“Me mbylljen e fushatës elektorale, Bashkia e Tiranës u kërkon të gjitha subjekteve politike të heqin brenda 24 orëve posterat, banderolat dhe flamujt nga ambientet publike të Tiranës. Në të kundërt, subjektet politike dhe kandidatët do të gjobiten, siç e parashikon ligji”, thuhet në njoftimin e shkurtër të bashkisë së kryeqytetit të bërë dje pas mesdite. Nenit 79 i Kodi Zgjedhor lidhur me materialet propagandistike parashikon që “kryetari i njësisë së qeverisjes vendore cakton, në mënyrë të drejtë dhe të paanshme, vendet publike për afishimin e materialeve propagandistike.

Komisioni Qendror i Zgjedhjeve miraton, me udhëzim të veçantë, kriteret për përzgjedhjen e këtyre vendeve. Çdo afishim i materialeve propagandistike jashtë vendeve publike të autorizuara sjell heqjen e tyre nga organet e zbatimit të ligjit, në varësi të njësisë qeverisjes vendore”.