Ryshfet 200 euro, arrestohen tre doganierë të pikës kufitare në Kakavijë

Tre doganierë të pikës së kalimit kufitar në Kakavijë përfunduan në prangat e policisë, pasi akuzohen për korrupsion pasiv.

Burime zyrtare të policisë sqaruan se janë arrestuar doganierët Ilirian Ymeraj , 42 vjeç, banues në Fier, si dhe Islam Thana , 42 vjeç , banues në fshatin Picar ,Gjirokastër dhe Eneida Çuçi , 35-vjeçe, banuese në Gjirokastër, me profesion doganiere në Pikën Doganore Kakavije.

Sipas policisë, doganieri Ymeraj ka marrë një shumë prej 200 eurosh për të lejuar kalimin kontrabandë të disa mallrave. Ndërkohë, dy doganierët e tjerë me veprimet dhe mos veprimet e tyre kanë lejuar kalimin e mallit teksa ishin në shërbim. Policia tha se është arrestuar në flagrancë edhe shtetasi Edison Qose, 42-vjeç, banues në Shkozë, Tiranë.

“Në aksin rrugor Kakavije -Tepelenë, në automjetin e tij tip “”Fiat”, u gjetën 1.3 ton mallra ushqimor, të cilat i kishte sjellë nga Greqia nëpërmjet Pikës Doganore Kakvijë duke shmangur detyrimet doganore, si dhe duke i dhënë doganierit të turrnit shtetasit Ilirian Ymaraj shumën prej 200 Euro”, sqaron policia.

Doganieri Ymeri teksa ka marrë vesh për arrestimin e poseduesit të mallrave kontrabandë ka braktisur detyrën dhe është larguar por është kapur gjate ndjekjes nga Policia e Gjirokastrës.

Dy doganierët e tjerë akuzohen për shpërdorim detyre, pasi kanë qenë në shërbim në Pikën Doganore Kakavijë dhe me veprimet dhe mos veprimet e tyre kanë lejuar kalimin e automjetit me ngarkesë ushqimore prej 1.3 ton mallra ushqimor.

Materialet i kaluan Prokurorisë së Rrethit Gjyqësor Gjirokastër për veprat penale. /Dita/