Në stacionin hekurudhor të Preshevës janë ndaluar nëntë emigrantë të vendeve afrikane, që po tentonin të kalonin ilegalisht kufirin.
Drejtoria e Doganave të Serbisë theksoi se pas kontrollit të një treni mallrash me anë të detektuesi special janë zbuluar emigrantët afrikanë në një nga vagonët.
Pas verifikimit të tyre është konstatuar se bëhet fjalë për emigrantë nga Sudani, Guinea, Somalia, Sierra Leone dhe Mali. Ata i janë dorëzuar policisë kufitare, e cila ka ndërmarrë masat plotësuese për mundësinë e deportimit të tyre në vendet e tjera.
Emigrantët kishin për synim të hynin në territorin e Serbisë dhe kishin si destinacion final vendet evroperëndimore. / INA