Presidenti i Ukrainës, Volodymyr Zelensky ka thënë se për vendin e tij nuk ka rrugë tjetër veç anëtarësimit në NATO. Ai i ka dhënë kështu një përgjigje të qartë Rusisë, që kërkon që një gjë e tillë të mos lejohet, por megjithatë Zelenskypranoi se anëtarësimi në NATO nuk mund të ndodhë tani. Sipas tij, ky është një proces i gjatë dhe Ukraina as që e ka filluar.
Nga ana tjetër, Sekretari i Përgjithshëm i NATO-s, Jens Stoltenberg, deklaroi sot se Rusia mund të përdorë një situatë jo reale për të justifikuar përdorimin e forcës kundër Ukrainës.
“Ne jemi të shqetësuar se Rusia po përpiqet të krijojë një pretekst për një sulm të armatosur kundër Ukrainës”, tha ai në një konferencë për shtyp në Bruksel.
“Rusia ka grumbulluar forcën më të madhe që kemi parë në Evropë për dekada në Ukrainë dhe rreth saj. Ka shumë oficerë të inteligjencës ruse të stacionuar në Ukrainë. Ne kemi parë përpjekje për të organizuar pretekst, operacione false për të ofruar një justifikim për pushtimin e Ukrainës”.
Një “sulm me flamur të rremë” është kur njëra palë organizon ose sajon një sulm kundër saj me qëllim që të justifikojë përdorimin e forcës në hakmarrje.
“Ne vazhdojmë t’i bëjmë thirrje Rusisë që të reduktojë, të tërheqë, forcat dhe të angazhohet në dialog”, shton Stoltenberg.
o.j/dita