Presidenti: Mazhoranca arrogante, opozita me kërkesa jashtë realitetit

Presidenti Ilir Meta, ka komentuar situatën politike në vend, duke u shprehur se kriza politike mund të tejkalohet me zgjedhjet e 13 tetorit.

Presidenti tha se institucioni i vetëm në vend që ka punuar për zgjidhjen e krizës është presidenca, duke theksuar se mazhoranca është treguar arrogante dhe jo bashkëpunuese e opozita ka kërkuar plotësimin e dëshirave  që dalin jashtë realitetit.

Meta u shpreh: “I vetmi institucion që në Shqipëri ka punuar në mënyrë të qartë për zgjidhjen e krizës për fat të keq është vetëm institucioni i Presidentit të Republikës. Më vjen shumë keq, si për maxhorancën, e cila me kokëfortësinë dhe arrogancën e saj në vend të tregonte përgjegjësi ka bërë të kundërtën. Ashtu sikurse opozita, me listën e dëshirave të pafundme, që shpesh dalin jashtë realitetit, e ka bërë të pamundur përfshirjen në institucione”.

Presidenti, gjatë një interviste për “A2”, ka komentuar edhe qëndrimin e ndërkombëtareve, duke  nënvizuar se disa prej tyre nuk kanë ndihmuar Shqipërinë në realizimin e objektivave të saj dhe kanë mbajtur qëndrim të njëanshëm.

Ai tha: “Por nuk mund të mos them se edhe një pjesë e faktorit ndërkombëtar janë sjellë në mënyrë tepër të njëanshme, tepër helmuese, duke mos dhënë asnjë kontribut që Shqipëria të përmbushë detyrimet që burojnë nga marrëveshja e Stabilizim-Asociimit me BE dhe që duhet ta ndihmojnë Shqipërinë të çelë negociatat me BE. Për fat të keq, Presidenti, edhe pse është ndjerë i vetëm, ka qenë i qartë dhe i vendosur për t’ia kursyer Shqipërisë një shëmti si farsa e 30 qershorit, që mund të jetë edhe një burim sanksionesh nga organizatat ekzistuese ku Shqipëria bën pjesë”.

e.ll./dita