Një familje që kthehej nga pushimet në bregun francez, harruan vajzën e tyre tre vjeçare në një park të dielën e shkuar dhe përshkuan 150 kilometra para se ta kuptonin që vajza e tyre nuk ishte me ta, sipas të përditshmes britanike “The Guardian”. Prindërit me kombësi franceze e kuptuan që kishin harruar fëmijën e tyre kur dëgjuan në radio një njoftim, shpjegoi policia franceze. Vajza u gjet nga disa udhëtarë të tjerë.
Gjithçka që vajza mundi t’u tregonte personave që e gjetën ishte që kishte një motër dhe një vëlla dhe që pa “makinën e babit të largohej” , komentoi një agjent i policisë franceze. Prindërit u morën në pyetje nga policia. “Duhet të dëgjojmë se çfarë do të na thonë për të vendosur nëse kjo çështje duhet të shkojë më tej”, shpjegoi një zyrtar.