Profesioni: Vota-vjedhës

Me  prezencën  mediatike ndoshta më të madhe në botë, qeveritarët tanë gjejnë kohë të flasin gjithë ditën për të gjitha llojet e fantazirave, gënjeshtrave, absurditeteve nga më pikantet, duke filluar nga renditjet që na vendosin në vendet e para në botë e deri te numri i këmbës së kryetarit të opozitës. Por flasin shumë pak ose aspak për atë që është detyra e tyre kryesore: punësimin real, pa të cilin të gjitha deklaratat për suksese ekonomike janë broçkulla. Një “profesion” me qindra dhe mijëra të punësuar dhe me të ardhura maksimale gjithsesi e kanë krijuar: quhet “vjedhës votash”. Është një profesion i nisur herët nga partia e Berishës dhe që ka ardhur duke u sofistikuar: ka gjasa që së shpejti në ndonjë nga bastionet e PD-së të hapë dyert ndonjë universitet i ri, ku ‘specialistë’ tashmë të kualifikuar dhe brezi i ri që do të marrë stafetën, të diplomohen për vjedhje votash.
Për herë të parë me këtë “profesion” jam ndeshur në zgjedhjet e vitit 1991. Rastësisht isha prezent pak para mbylljes së kutive të votimit në fshatin Juban të komunës Guri i Zi të rrethit Shkodër. Kur po vinte momenti i mbylljes së kutisë së votimit, pra mbyllja e procesit, hoqën dritat. Mbas kësaj u bë largimi i përfaqësuesve të forcave të tjera politike diku me të mirë e diku me të keq, dhe “procesi vazhdoi” deri në përfundimin e numërimit prej ku fitoi dukshëm forca politike që kishte patentën e kësaj shpikjeje. Ne tifozëve të demokracisë dhe sistemit që rrjedh nga zbatimi i saj, veprime të këtij lloji na habitën dhe sidomos na zhgënjyen. Por ata që u morën me procesin e lartpërmendur, natyrisht nuk e kishin pjellë të vetën. Në vitet më pas e ndjekur nga rreziku i lënies shpejt të pushtetit, e vulosur kjo me votimin kundër që bëjnë në vijimësi shqiptarët kundër Berishës, kjo forcë politike e hodhi në treg për përdorim masiv shpikjen e vet tashmë të provuar në shumë qendra votimi: vjedhjen e votave.
Edhe sot në vend që të merren me problemet madhore dhe të shumta që ka një vend i keqqeverisur, kjo forcë politike ka adaptuar vetëm një pikësynim: si të sigurohen votat pavarësisht nga dëshira e votuesve. Me çdo mënyrë, me çdo rrugë, duke mos u ndaluar para asnjë shkeljeje, duke abuzuar në çdo gjë dhe kudo. Me këtë qëllim në kokë, që tashmë është kthyer në obsesion, siç dëshmojnë ngjarjet e fundit me KQZ-në, PD dhe lidershipi i saj i kanë bërë dëme të tmerrshme vendit:
Është lejuar të shpërdorohet çdo gjë nga pasuria e shtetit monist;
Është lejuar zënia dhe pastaj pushtimi pa kthim i pronave të ish-pronarëve;
Është lejuar ndërtimi pa asnjë kriter urbanistik në shkelje të plotë të të gjitha akteve ligjore dhe nënligjore;
Është lejuar të hysh në punë në administratë pa patur asnjë aftësi vec të sipërpërmendurës;
Është lejuar të mos paguash apo të kesh lehtësira në taksa dhe tatime;
Është lejuar të fitosh pa konkurencë, pa meritë dhe në shkelje të të gjitha ligjeve e rregullave tendera, kompensime apo ndihmë ekonomike; të punosh me kohë të pjesshme, edhe në detyra të rëndësishme si drejtorë drejtorie e deri në detyra të thjeshta. (tashmë dihet se në Shkodrën tonë ka me dhjetëra dhe qindra persona me emra, adresa dhe targa makinash, që marrin rrogën në ndërmarrje dhe institucione të ndryshme pa u paraqitur në punë, siç ka me dhjetëra të tjerë që marrin ndihma ekonomike të pamerituara apo favore fiskale).
Dhe të gjitha këto mbështetur vetëm në një kriter: të njohësh dhe të vësh në zbatim profesionin tashmë shumë të suksesshëm të vjedhësit të votave.
Vjedhja e votave tashmë tentohet qysh në manipulimin e listave zgjedhore nëpërmjet shpërndarjes së votuesve në adresa të paqena votimi në disa qendra, votimi në emër të emigrantëve dhe të indiferentëve me karta dhe certifikata të falsifikuara etj, etj. Manipulohen, shantazhohen, paguhen me të gjitha mënyrat edhe anëtarët e proceseve të numërimit nga këta profesionistë që shpeshherë janë kontigjentë kriminalë. Janë ofruar pagesa për anëtarët e komisioneve të numërimit vetëm për të qenë indiferentë në proces ose për të mbyllur sytë kur kutitë e votimit janë ndërruar natën nëpër banjat e ambienteve ku është kryer procesi i votimit. Vjedhësi i votave vepron edhe duke i detyruar arsimtarët të lënë mësimin me preteksin e ekskursionit në Tiranë, për të qenë pjesë e detyrueshme e aktiviteteve të PD-së apo mbyllja e shkollës për të mbushur sallat bosh të kësaj force politike.
Vidhet vota duke i dhënë leje të inkriminuarve për të qenë të pranishëm në procesin e votimit në mbështetje të PD-së në pushtet.  Vidhet vota, duke i shantazhuar punonjësit e administratës me fotokopje të dokumenteve të identitetit dhe me detyrimin për të shkuar në grup në aktivitetet e PD-së në shkëmbim të ruajtjes së vendit të punës. Vidhet vota, duke i zëvendësuar në shumicë drejtorët dhe nëndrejtorët e arsimit me votues të detyrueshëm të së djathtës në shkëmbim të privilegjeve.
Është tashmë e qartë si po agravohen këto probleme tek ne. Por është gabim të vazhdojmë të lejojmë kjo gjendje dhe ta pranojmë si fakt këtë shfaqje të shëmtuar. Jemi të shantazhuar, hallakatur, mashtruar, gënjyer nga një strategji mediatike gënjeshtrash dhe relativizimesh si e vetmja mënyrë, e përsëris, aktuale qeverisjeje. Qytetari i thjeshtë po ndihet i hutuar dhe pa rrugëdalje dhe nën këtë presion ai nuk voton. Edhe kjo është vjedhje votash.
Vidhet vota edhe duke i zëvendësuar nëpër institucione të rëndësishme specialistët me militantë partie që plotësojnë vetëm një kusht: janë votues të PD-së. Vidhet edhe duke e shantazhuar specialistin e shëndetësisë, i cili mendon ndryshe, por rezervohet për të qenë pjesë e aktiviteteve të së majtës: janë detyruar me qindra punonjës të kualifikuar të mos marrin pjesë në aktivitete politike, qoftë edhe si dëgjues, sepse penalizohen. Penalizohen me të gjitha mënyrat dhe format, që kjo pjesë e elitës intelektuale të vendit të qëndrojë pasive. Të gjithë e dimë se ky popull ka nevojë për ta, sepse nuk ka dhe nuk do të ketë demokraci vetëm me një forcë politike, sepse me një forcë politike na kthehet monizmi, antivlerat e të cilit i kemi “shijuar” e po i shijojmë 20 vjet më pas përsëri.