Pronarët: Ligji kundër interesave tona, do ta çojmë në Kushtetuese

Shoqatat e Pronarëve vazhdojnë të kundërshtojnë fort projektligjin e prezantuar nga qeveria tri ditë më parë për kthimin dhe kompensimin e pronave. Pas Agim Toros, ka reaguar edhe përfaqësuesi tjetër i shoqatës “Pronësi me Drejtësi”, Myrshit Vorbsi, i cili ka thënë se ky ligj nuk e zgjidh problemin disavjeçar, por kthehet në një barrë fiskale për pronarët. Shoqata “Pronësi me Drejtësi” bën të ditur se nuk do të ndalet thjesht me reagime dhe kundërshti në distancë, por do ta padisë projektin e qeverisë në Gjykatën Kushtetuese.

Nuk ka faturë

“Është një lojë shumë e keqe që është kundër interesave të pronarëve. Është një lojë që patjetër do të vazhdojë në Gjykatën Kushtetuese për ta mbyllur dhe që patjetër do të vazhdojë lufta në Gjykatën e Strasburgut,” thotë Vorbsi. Sipas tij, ky ligj vjen i pashoqëruar me faturën financiare që shteti u detyrohet pronarëve, ndërsa sipas tij janë përdorur mekanizma tinzarë që dëmtojnë pronarët.

Reduktohet kompensimi

“Te ky pr/ligj që ka paraqitur qeveria, tokë truall quhet ajo që ka qenë e tillë qysh në vitin 1945. Kjo do të thotë që as më shumë e as më pak rreth 2/3 e kësaj sipërfaqe toke, rreth 15 mijë ha, ku përfshihen edhe shtëpitë që i janë kthyer pronarëve të reduktohet deri në 5 mijë ha maksimumi, ndërkohë që sipërfaqja e tokës për kompensim, por që do të kompensohet tokë bujqësore është kjo diferenca tjetër 8-10 mijë ha,” analizon Vorpsi ligjin e ri.

Kthimi dhe kompensimi

Një tjetër shqetësim i Shoqatës lidhet me faktin se në draftin e qeverisë hiqet termi ‘kthim’ dhe lihet vetëm ‘kompensim’. “Qeveria ka bërë edhe një lëvizje tjetër. Edhe këtë 5 mijë ha që i është kthyer pronarëve të Shqipërisë, i thotë unë nuk ta njoh për kthim prone, por ta njoh për kompensim, por me çmimin që kam vendosur sot jo me atë që kërkojë ti atëherë,” thotë Myrshit Vorpsi.

AKKP

Por ndryshe nga pronarët, Agjencia e Kthimit dhe Kompensimit të Pronave i hedh poshtë këto pretendime si dhe sqaron formulën për kompensimin financiar të 26 mijë dosjeve që prej 23 vitesh presin për tu kompensuar në favor të pronarëve pa përcaktuar mënyrën se si, si dhe 9300 dosjeve të tjera që do të shqyrtohen në një afat tre vjeçar, sipas ligjit të ri. “Në qoftë se pronarët nuk e kanë kuptuar që ky draft-ligj njeh procesin e kthimit si një proces njohje prone dhe kompensimi fizik në pronën e njohur, atëherë ky është një sqarim të cilën në ditët e ardhshme me siguri do ta bëjmë me njëri-tjetrin. Instrumenti është i njëjtë për të tërë ata që në vitin e shpronësimit e kanë patur tokën zë kadastral tokë bujqësore dhe sot e kanë tokë truall do të kompensohet me zërin kadastral tokë bujqësore por me vlerën aktuale të tregut për këtë zë kadastral”, thotë Sonila Qato, drejtoresha e AKKP-së. Drafti i ri për pronat u prezantua tri ditë më parë nga kryeministri Edi Rama. Prej 26 muajsh, Agjencia për Kthimin dhe Kompensimin e pronave kishte pezulluar çdo vendim në pritje të dixhitalizimit të arkivit.