Ndryshimet legjislative në Kodin Penal cilësohen si një nga nismat për parandalimin e diskriminimit në radhët e grupeve të caktuara të popullatës. Sipas të dhënave të bëra publike nga Komisionerja për Mbrojtjen ndaj Diskriminimit, rezulton se gjatë vitit 2013, pranë këtij institucioni janë depozituar rreth 42 ankesa me bazë diskriminimin, kryeisht në vendet e punës, shkollë, etj. Autoritetet e këtij institucioni bëjnë me dije se në realitetet rastet janë më të shumta, por që mbeten pa u identifikuar. Ekspertët që mbrojnë të drejtat e njeriut u kërkojnë strukturave qeveritare që të ndërmarrin hapa konkretë për të reduktuar këtë dukuri negative. Gjatë një tryeze të organizuar nga komisionerja për mbrojtjen ndaj diskriminimit Irma Baraku, ku është kërkuar fuqizimi i institucionit si një hallkë e rëndësishme për respektimin e të drejtave të njeriut, kanë qenë të pranishëm edhe kreu i Kuvendit Ilir Meta, si dhe ministria e Arsimit Lindita Nikolla. Kryeparlamentari Ilir Meta, shprehet se është e nevojshme të bëhen ndryshime në Kodin Penal, po ashtu edhe në kurrikulat mësimore duke shmangur pjesët diskriminuese për grupet e ndryshme. “Duhet të mbështes nevojën për ndërhyrje legjislative në Kodin Penal dhe eliminimin në programet e shkollave të literaturës që paragjykon kategori të caktuara sociale në vendin tonë. Progres raporti për vitin 2013 është gjithashtu një dokument shumë i rëndësishëm që këshillon dhe orienton të nesërmen tonë në këtë drejtim. Askush nga qytetarët tanë nuk duhet të ketë trajtim të ndryshëm për shkak të bindjeve politike, të orientimit seksual, mundësive ekonomike, të aftësisë së kufizuar apo për çdo shkak tjetër”, vuri në dukje Meta. Në të njëjtën linjë është pozicionuar edhe ministria Nikolla, ku ka konfirmuar gatishmërinë e Ministrisë së Arsimit që do të përfshihet plotëisht në politikat arsimore për të kthyer në shkollë çdo fëmijë, si dhe duke integruar në shkolla tekste që luftojnë diskriminimin. “Jemi të vendosur për një arsim cilësor dhe gjithëpërfshirës, sepse ky është një parakusht për të siguruar cilësinë e jetës. Do të bëjmë që çdo fëmijë, si ai që vjen nga një familje me vështirësi ekonomike, edhe fëmija që ka vështirësi në të nxënë, edhe fëmija që vjen nga komuniteti rom apo nga një komunitet që ka një etni, gjuhë apo kulturë tjetër. Edhe fëmija me aftësi të kufizuara”, u shpreh ministri Lindita Nikolla.