Gomerë dhe maska, opozita tenton ironinë në vend të molotovëve

Opozita e bashkuar protestoi këtë të hënë të 8 korrikut, pas 30 qershorit.

Protesta u mbajt në dy stacionet tradicionale, Kryeministri dhe Parlament.

Në këto ditë të nxehta korriku opozitës i është shtuar edhe një sfidë tjetër: lirimi ose jo i zyrave nga kryebashkiakët e djathtë.

Rreth një orë para nisjes, Partia Demokratike ka deklaruar se drejt Tiranës kanë udhëtuar rreth 70 mijë qytetarë për të marrë pjesë në protestë.

Sipas PD-së, këtij numri i duhen shtuar edhe qytetarët e Tiranës.

Disa mbështetës të opozitës dhe protestues janë nisur në këmbë drejt bulevardit “Dëshmorët e Kombit”.

Në duar ata mbajnë një pankartë të madhe ku shkruhet “Rama ik” në 3 gjuhë, shqip, anglisht dhe gjermanisht, si dhe kujtohet shifra prej 85 % e shqiptarëve që sipas PD refuzoi farsën e 30 qershorit.

Veç mesazheve politikë, protesta ka dhe doza ironie ndaj kryeministrit Rama. Për këtë, nga selia e PD është nisur drejt sheshit të protestës edhe një gomar, të cilit përfaqësues të PD i kanë veshur një “bluzë” kur shkruhet “PS 30 qershor”, si ato që mbante Rama gjatë fushatës.

Një kuti e madhe votimi 2 metra e larte mbahet nga të rinjtë që në fytyrë mbajnë maskat e protagonistëve të dosjeve të votave 339 dhe 184, Vangjush Dakos, Damian Gjiknurit, Ulsi Manjës dhe personave të tjerë të përfshirë në audiopërgjimet e botuara nga BILD.

Një pjesë e protestuesve mbyllen gojët me fasha për të simbolizuar mungesën e fjalës së lirë.

Nuk mungojnë as fotot e diktatorit koreano verior, Kim Jong Un.

Protestës i janë bashkuar edhe banorët e Astirit, që protestojnë prej muajsh, si dhe artistët që janë kundër shembjes së godinës së teatrit.

e.ll./dita