Nuk ka të ndalur dhuna në Egjipt. Të paktën 30 persona të tjerë kanë vdekur dhe qindra janë plagosur gjatë protestës së djeshme në Port Said, e cila nisi pas dhënies së dënimit kapital për 21 të pandehurit e masakrës së ndodhur shkurtin e kaluar në stadium, kur mbështetësit e skuadrës vendase u përleshën me ultrasit Ahly, duke shkaktuar 73 viktima. Përvjetori i kësaj masakre është transformuar në një protestë kundër presidentit Morsi dhe Vëllazërisë Myslimane, ndërsa dhënia e dënimit dje ka shërbyer si pretekst për një valë të re dhune. Vendimi për çështjen Port Said pritej me padurim, për shkak të vlerës politike dhe simbolike. Ultrasit e grupit Ahly njihen si mbështetës të flaktë të revolucionit dhe e konsiderojnë ngjarjen në Port Said një sulm të paramenduar. Protesta e dhunshme që pasoi vendimin e detyroi ushtrinë të zbriste në rrugët e Port Saidit. Presidenti anuloi vizitën e tij në Adis Abeba dhe kaloi pjesën më të madhe të ditës duke zhvilluar konsulta me Këshillin Kombëtar të Mbrojtjes. Në përfundim, Ministri i Informacionit, Salah Abdel Maksud, ka bërë një apel për dialog kombëtar. Ai ka akuzuar presidentin Morsi për përdorimin e policisë për të shtypur protestat dhe ka kërcënuar se do të bojkotojë zgjedhjet parlamentare. Ndërsa Vëllazëria Myslimane ka akuzuar mediat dhe opozitën për komplot. Ndërkohë, qendra e Kajros vazhdon të jetë e mbështjellë nga mjegulla dhe gazi lotsjellës.