Provimet e lirimit, në 2015 edhe anglishtja provim i detyruar

Krahas maturës, gjuha e huaj do shtrihet si provim i detyruar edhe në arsimin 9-vjeçar. Në provimet kombëtare të përfundimit të klasës së 9-të nxënësit do të japin edhe lëndën e gjuhës së huaj, e cila mund të jetë anglisht, frëngjisht ose ndonjë gjuhë tjetër që nxënësit e kanë zhvilluar në shkollë gjatë viteve të studimit. Autoritetet e arsimit bëjnë me dije se ka nisur puna për konkretizimin e kësaj nisme, ku parashikohet që brenda një harku të shkurtër kohor të jepen edhe detajet konkrete se si do të realizohet një ndryshim i tillë.

Në këto kushte, në provimet e lirimit duke filluar  nga viti 2015 do të jepet edhe gjuha e huaj, zbatimi i të cilës është përcaktuar edhe në ligjin e arsimit parauniversitar. Në nenin 72 të ligjit të ri për arsimin parauniversitar, pika katër shprehet qartë se provimi i gjuhës së huaj i arsimit bazë i shtrin efektet e zbatimit në vitin 2015.

Në këtë mënyrë nxënësit e klasave të 8-ta aktualisht duhet të nisin përgatitjet për një tjetër provim kombëtar që i pret në vitin pasardhës, i cili përkon me mbarimin e arsimit bazë. Edhe pse nuk i tremben një fakti të tillë, nxënësit e shkollave 9 vjeçare sqarojnë se për të pasur rezultate më të mira në mësimin e gjuhëve  të huaja është e nevojshme që të rishihet mundësia e shtimit të orëve të mësimit që duhet të zhvillojnë në shkollë. Kjo pasi në planin aktual orët e përcaktuara shihen si të pamjaftueshme çka i detyron të rendin drejt ndjekjes së kurseve private individuale.

Ndërsa mësueset e gjuhës angleze në shkollat 9-vjeçare, shprehen se duke parë prioritetet që po merr mësimi i gjuhëve të huaja kanë shtuar orët e mësimit të gjuhës së huaj në javë, kjo për të ndihmuar nxënësit që të përvetësojnë si duhet tekstet. Këto të fundit janë metoda të përshtatura sipas niveleve dhe moshës së nxënësve.