PS ripërsërit kërkesën për heqjen e taksës biznesit të vogël, si një masë për të lehtësuar krizën ekonomike. Përmes një deklarate për shtyp, deputetja socialiste Ermonela Felaj, u shpreh se heqja e taksës për biznesin e vogël do të nxiste sipërmarrjen dhe do të lehtësonte krizën ekonomike.
“Duke hequr taksën e biznesit të vogël, qeveria jo vetëm do të nxiste sipërmarrjen dhe do të lehtësonte krizën ekonomike, por do të jepte një mundësi më shumë për familjet shqiptare që në këto ditë të fundvitit të festonin siç e kërkon edhe tradita”, deklaroi deputetja Ermonela Felaj.
Sipas socialistes Felaj, “biznesi i vogël, që në fund të fundit është biznesi familjar dhe që mban në këmbë ekonominë e vendit, ka nevojë për frymëmarrje”. Ajo kërkoi që kërkesa e PS të miratohet javën e ardhshme gjatë diskutimeve të projektbuxhetit.