“Vocrrakët” në shërbimin aktual diplomatik të Shqipërisë

Ministria e Jashtme e Republikës së Shqipërisë është shndërruar në seksion të Partisë Demokratike, në shërbim të Sali Berishës. Që prej 2005-s, kur Sali Berisha mori pushtetin pa pasur ai vetë shumicën e mjaftueshme, shtriu kthetrat për të emëruar ambasadorë në shtetet e konsideruara partnere strategjike të Shqipërisë, militantë jo profesionistë në çështjet e politikës së jashtme për t’i patur nën komandë e për të punuar për interesat e tij ekonomike e politike, në shkelje të hapur me Kushtetutën e Ligjin për Shërbimin e Jashtëm.

Ministri i tij i Jashtëm bëri të njëjtën gjë në nivelet e tjera të shërbimit diplomatik e kjo ishte edhe më e rëndë sepse Ligji për Shërbimin e Jashtëm nuk parasheh në asnjë rast emërimë jashtë fushës së diplomacisë për të gjitha nivelet e pozicionet në karrierën diplomatike dhe fare qartë parasheh mënyrën e rekrutimit në shërbimin e jashtëm, i cili nuk mund t’i shpëtonte politizimit e militantizimit sikurse nuk shpëtoi as administrata publike.

Presidenti Moisiu refuzoi të dekretonte një numër kandidaturash të propozuara nga Berisha të cilat nuk përmbushnin kriteret për të përfaqësuar vendin me integritet e dinjitet e për të punuar vetëm për interesat e vendit e të kombit në bazë edhe të misionit të politikës së jashtme të sanksionuar me Kushtetutë. E vlerësoj faktin që edhe Presidenti Topi nuk mbylli sytë kur ishte çështje e përfaqësimit më të lartë të vendit.

Të refuzuarit prej dy Presidentëve të nderuar u strehuan në Ministrinë e Punëve të Jashtme si syri dhe veshi i Berishës brenda ministrisë, por edhe në nivele të tjera të shërbimit në përfaqësitë tona diplomatike. Me këtë akt u përligj çdo shkelje ligjore për emërimet në diplomaci dhe sot kemi mbi 70% të emërimeve jashtë parametrave të ligjit dhe me bazë nepotike. Kjo më së pari dëmton vetë shërbimin e jashtëm dhe bëhet pengesë për krijimin e konsolidimin e një shërbimi diplomatik të karrierës së kualifikuar e me profesionalizëm të lartë në shërbim të interesave të vendit.

Diplomatët profesionistë të karrierës nuk mund t’i lejojnë vetes dhe integriteti i tyre profesional nuk i lejon ata të shfaqin në kryerjen e detyrës afilijime pranë partive politike apo të gjenden e të marrin pjesë në konfliktualitetin mes forcave politike  e aq më pak ta vendosin konfliktualitetin në mjedise të kulturuara në vendet mike ku presupozohet se i shërbejnë shtetit e kurrsesi pushtetit.

Ata e dinë që MPJ duhet të qëndrojë mbi partitë e ata e dinë mirë që Kryeministri i nesërm, lideri i opozitës është po aq i rëndësishëm sa kryeministri i sotëm e shërbimi diplomatik i një vendi anëtar i NATO-s e që pret të marrë statusin e vendit kandidat në BE tejkalon mandate të mazhorancave të caktuara.

“Vocrrakët” në shërbimin aktual diplomatik të Shqipërisë kanë humbur pjesë të personalitetit e janë shndërruar në instrumente të verbra të shefave të tyre e pikërisht për këtë edhe janë emëruar. Është e vetmja rrugë që ata të zgjasin punësimin në përfaqësitë e Republikës së Shqipërisë jashtë çdo kriteri ligjor sikurse edhe janë emëruar dhe shëtisin nga një ambasadë në tjetrën mbasi përfundojnë një term kohor shërbimi duke refuzuar të kthehen në MPJ në Tiranë, në atdhe sikurse e saktëson ligji e të qëndrojnë jo më pak se dy vjet para se të marrin emërim tjetër.

Diskriminimi që pësojnë diplomatët e karrierës si pasojë e shkeljes së ligjit prej drejtuesve të MPJ është i papranueshëm e i dënueshëm.

Ku fillon e keqja? Pa asnjë mëdyshje te Kryeministri. Dje në parlament u ofroi përsëri shqiptarëve e ndërkombëtarëve shfaqjen e radhës ku ai u jep udhë pasioneve të egra të përzjera me frikën e dëshpërimin që po i vjen fundi e nuk e shpëton dot as “vocrraku” që e kthen në kazus parlamentare duke e fyer më së pari atë vetë edhe familjen e tij që “nuk qenka në gjendje të vërë në vend nderin e vet”, nëse ky nder i qenka cenuar, sipas një letre të hapur.

E sigurt është që ‘diplomati’ nuk ka qenë aty për arsye shtetërore e në krye të detyrës. Një pinjoll i një familjeje të nderuar e të respektuar, përtej mënyrës si është rekrutuar në shërbimin e jashtëm, duhet të jetë i pari të zbatojë ligjin e të kryejë detyrën për të cilën paguhet me paratë e shqiptarëve e duhej t’i kish mbushur mendjen të atit të rrinte aty ku ishte, këshilltar i Berishës e jo t’i hynte në pjesë të birit duke shkuar Ambasador e duke shënuar rast të pastër të emërimeve nepotike e në shkelje flagrante të ligjit, kur edhe për emërime ambasadorësh parashihet që vetëm 20% mund të jenë jashtë sferës së diplomacisë, raport ky që rezulton i përmbysur në favor të emërimeve politike.

Opinioni publik ka parë çudira në foltoren e MPJ. Dje pamë një figurë të thekur stoike tetëvjeçare që nuk kupton asgjë nga diplomacia, që më shumë shëmbëllente me një përgjegjëse të ndërmarrjes së gjelbërimit në bashki, tek sulmonte liderin e opozitës. Pas saj shihej qartazi stema e MPJ të Republikës së Shqipërisë.

Kjo marionetë e paaftë ende nuk e di që Republika është e të gjithëve dhe MPJ duhet t’i shërbejë edhe opozitës. Oreksin për të folur ta kënaqte te foltorja e PD-së me siglën e PD-së në sfond. Këtë thotë ligji.

Para pak ditësh ministri bëri të njëjtën gjë. Keqardhje që nuk konsultohet me zonjën e tij të cilën e ka diplomate karriere, por me siguri puna e tij e re i duket si dega e PD Tiranë, të cilën ai drejton.

Ministra të tjerë në MPJ vitet e fundit kanë bërë edhe më keq. Servilizmi dhe keqpërdorimi i postit i ka nxitur të dezinformojnë opinionin e partnerët ndërkombëtarë duke instruktuar diplomatët të thonë të pavërteta lidhur me interpretimin e ngjarjeve të 21 Janarit e manipulimit të zgjedhjeve të 2011-s në Tiranë, vizion i mangët e mentalitet i cunguar për misionin e diplomacisë dhe të funksionimit të shtetit.

Dje në parlament ndjeva dëshpërim për vendin tim edhe për vete që ndaj të njëjtën sallë me krijesa që parlamentit i shtuan veset e i zhbënë virtytet, e më erdhi në mend i madhi Dritëro kur ai ishte vetë në atë parlament e kur Berisha ishte President “në vendin tim, në vendin tënd, një i çmendur të gjithë i çmend”.

Botuar sot ne DITA