Pse PD-ja të mos marrë godinën e Presidencës?!

Nuk ka rëndësi çfarë ishte. Por mënyra, procesi dhe koha e marrjes së vendimit për SHQUP-in. E morën në ikje. Fshehtas. Kanë pasur 20 vjet për ta kërkuar. Kanë pasur 8 vjet kohë për ta marrë. Nuk kanë besuar në institucione por në njerëz. Kanë pritur momentin ti kenë të gjitha, Presidentin, Kryeministrin, Kryetarin e Bashkisë. Por prapë kanë pasur kohë 2 vjet për ta arsyetuar.

Pse tani?

Së pari, sepse e dinë se nuk mund ti kenë më të gjitha institucionet. Njëri ka rënë, Qeveria.

Së dyti, nuk mund ta kenë më as Kryetarin e Bashkisë, pas një viti e gjysmë, për të ligjëruar procedurën e transferimit të godinës.

E mjaftueshme për të dyshuar se prapa këtij veprimi s’ka asnjë arsye që lidhet me interesat e opozitës së sotme. Në emër të opozitës po spekulohet, për të ndërtuar për interesa personale.

Nuk japin arsye pse e marrin. Japin kundër-arsye banale. “Meqenëse ndërtesa ishte jashtë funksionit, po e marrim ne” ani pse nuk ju duhet, nuk e kanë të nevojshme për aktivitet partie.

Të gjithë e dinë pse ndodh. Kjo është me e rënda. Nuk e kanë problem pse gënjejnë, pse dalin kundër ligjit. E shohin veten të mbrojtur, i kanë kopsitur gjërat. A ka popull këtu?

Ndërkohë që kryespecialisti i kësaj pune thotë të kundërtën. Shefi i Shtabit të Ushtrisë e refuzon zyrtarisht këtë “pushtim”. As këtë nuk e përmendin. “Ndërtesë e re dhe: Përpara, përpara, përpara” – thonë. Me të njëjtin mentalitet që e çuan PD-në në katastrofë.

Tani që faktet kanë dalë beteja është ligjore. Administrative dhe hetimore. Qeveria e re thotë se do të zbatojë ligjin. Kaq.

E dimë se treshja do të çojë turma për të sulmuar ushtrinë. Por nuk ka budallenj, të sakrifikohen për bizneset e kupolës në ikje. E dimë se ka interesaxhinj, e do dalin, po sa janë e kush janë?

PD-ja rrezikon të çahet, me këso veprimesh haptazi në favor të kupolës. Ajo po futet në një betejë pa kuptim me një ushtri të NATO-s. Nuk do të ketë asnjë mbështetje, ndërkombëtare jo e jo. Në një përplasje me ushtrinë e vet, ajo rrezikon shpërbërjen. Duke harruar se kjo lloj ushtrie, të paktën në letra, ka rregulla.

Kryetari i Bashkisë është pozicionuar hapur kundër interesave publike në Tiranë. Kreu i shtetit është pozicionuar kundër interesave themelore të shtetit. Ky tjetri “hajduti i ndershëm” tani na duhet vetëm për dy gjëra: së pari, si simbol i gjallë për të kuptuar se çfarë qeverisje katastrofike kemi pasur, dhe, së dyti, na duhet për humor. Në kushte pafuqie, është njëtrajtshmërisht qesharak.

Nëse ka sot një godinë pa funksion është ajo e Presidencës. Madje me funksione të përkundërta me ato që përcakton Kushtetuta. Të paktën edhe për nja katër vjet. E nëse është kështu, pse PD-ja të mos marrë godinën e Presidencës? Arsyen e kanë të “fortë”. U ndërtua për llogari të Rusisë. Mjafton kjo. Është arsye më e fortë se ajo e bërxollave te SHQUP-i. Do ishte kompensim edhe për Presidentin vetë.