Lista e të kërkuarve, një në dy shqiptarë të rritur e ka klikuar

Pothuajse një në dy shqiptarë të rritur ka shprehur interesin për të klikuar në faqen e Policisë së Shtetit, për listën e personave të kërkuar për krime të ndryshme. Ministria e Brendshme dhe Policia e Shtetit, listuan në internet një grup prej 742 personash, mes tyre edhe të njohur. Bie në sy emri i ish-shefit të shtabit të Forcave të Armatosura, gjeneral Luan Hoxha, i dënuar me 5 vite burgim për shpërthimin e Gërdecit më 15 mars 2008, i cili ka marrë edhe një azil në Shtetet e Bashkuara të Amerikës. Zëdhënësja e Policisë së Shtetit, Laura Totraku, njoftoi mbrëmë se numri i klikimeve drejt faqes së Policisë së Shtetit, në internet, në rubrikën e personave të kërkuar, ka qenë tepër i lartë.

“Nga momenti i publikimit të informacionit, rreth orës 15:30 të ditës së diel, për personat e kërkuar në faqen e Policisë së Shtetit në internet janë evidentuar rreth 1,616,900 klikime. Ndërkohë vetëm gjatë orës së fundit numri i klikimeve nga qytetarët është rreth 53560”, tha ajo. Nëse do e llogarisim me numër të përafërt të popullsisë shqiptare, përfshirë edhe emigrantët, pothuajse një në dy shqiptarë të rritur, me mundësi interneti, (duke përjashtuar fëmijët nën 14 vjeç, ndërsa lista e votuesve është 3,2 milionë persona), ka klikuar në këtë faqe, pasi ka qenë i interesuar për të gjetur nëse ka pasur të njohur apo të afërm.

Nënvizohet se lista nuk është përfundimtare dhe vijon të rifreskohet me të gjithë emrat e personave në kërkim, të dënuar apo në hetim për krime të ndryshme. Ndoshta nga ky fakt edhe interesimi në klikime brenda kësaj faqeje është i lartë dhe vijon të tërheqë njerëz të shumtë. Policia sqaroi se ndërtimi i listës është në proces dhe do ketë rifreskime apo heqje të gabimeve të disa emrave të personave që nuk jetojnë më, apo që tashmë janë arrestuar. “Ju bëjmë me dije gjithashtu se kjo faqe do të përditësohet në vijimësi, duke hequr nga lista personat, të cilët anulohen nga kërkimi dhe shtuar persona të tjerë, të cilët do të shpallen në kërkim”, tha Totraku.

Policia e Shtetit publikoi të dhënat për personat më të rrezikshëm të shpallur në kërkim nga policia dhe organet e drejtësisë në listën prej 742 personash, ku bien në sy emrat e ish-Shefit të Përgjithshëm të Shtabit të Ushtrisë, Luan Hoxha, i cili rezulton në listën e personave të shpallur në kërkim pas vendimit të Gjykatës për çështjen “Gërdeci” dhe i dënuar me 5 vite burg, por me azil në SHBA.

Një tjetër emër i rëndësishëm është dhe ish-komandanti i Gardës së Republikës në vitin 1997, Xhahit Xhaferri dhe Arjan Cengës, ish-Shef Operativ të dënuar nga gjykata për rebelim, dezertim i kuadrit komandues. Në listën e të kërkuarve janë dhe persona të vdekur, Çajup Qejvani, i dënuar për grabitje gjatë 1997, është vrarë në 19 tetor 2008 në Athinë të Greqisë. Po kështu rasti i Izet Haxhisë, i akuzuar si bashkëpunëtor në vrasjen e Azem Hajdarit në vitin 1998, që figuron në listën e personave të shpallur në kërkim, pavarësisht se është i arrestuar në Turqi që prej 2006-ës. E njëjta gjë për Enver Dondollakun, i arrestuar në vitin 2006 në Padova të Italisë. Dondollaku është dënuar nga Gjykata e Krimeve të Rënda për një seri vrasjesh të kryera si pjesëtar i Bandës së Lushnjës. Në listë, 47 persona janë dënuar me burgim të përjetshëm dhe 101 me nga 25 vjet burgim, për krimet e vrasjeve.