Putin në Turqi, pavarësisht dallimeve, tregtia vazhdon mes dy vendeve

Presidenti rus u takua me Presidentin turk për të diskutuar çështjet energjetike dhe tregtare mes dy vendeve, që pavarësisht divergjencave për krizën në Siri dhe në Ukrainë janë të vendosur të forcojnë bashkëpunimin.

Presidenti i Rusisë, Vladimir Putin, vizitoi dje Ankaranë, ku u takua me homologun e tij turk Reccep Tayyip Erdogan, për të diskutuar mënyrat e rritjes së bashkëpunimit të ndërsjellët ekonomik. Putin zbriti në Ankara në orën 12:00 sipas orës lokale, i shoqëruar nga 10 ministra të kabinetit të tij për takimin vjetor të Këshillit të Bashkëpunimit të Nivelit të Lartë mes Turqisë dhe Rusisë. Para mbërritjes në pallatin presidencial për t’u takuar me Erdogan, Putin bëri nderime për liderin themelues të Turqisë, Mustafa Kemal Ataturk në mauzoleun Anitkabir në Ankara. Putin la një kurorë me karafila të kuq dhe të bardhë në varrin e Ataturkut dhe pastaj u drejtua në një dhomë të veçantë për të shkruar në Librin Memorial të Ataturkut në rusisht. Të gjitha bisedat u realizuan në kryeqytetin turk, Ankara, ku pallati presidencial vazhdon të jetë burim diskutimesh për shkak të luksit dhe kostos së lartë të tij. Pas Papa Françeskut, Vladimir  Putin bëhet kreu i dytë i një shteti që shkel super pallatin prej 1000 dhomash dhe një kosto zyrtare prej 492 milionë euro.

Ndërkohë që qeveria turke mbështet fuqishëm Ushtrinë e Lirë siriane, Rusia është një nga sponsorët më të mëdhenj ndërkombëtar të regjimit të presidentit sirian, Bashar al Assad. Rusia dhe Turqia gjithashtu kanë pikëpamje të ndryshme lidhur me situatën në Ukrainë dhe ishullin e ndarë të Qipros, por këto dallime nuk kanë penguar që marrëdhëniet dypalëshe të tregtisë të forcohen gjatë këtyre viteve të fundit, duke arritur në 2013-ën një shumë prej 32 miliardë dollarësh.

Të dy qeveritë kanë vendosur si objektiv të rrisin tregtinë dypalëshe deri në 100 miliardë dollarë në vitin 2020 dhe Moska ka inkurajuar kompanitë turke të përfitojnë nga sanksionet ekonomike të Bashkimi Europian për të përmirësuar pozitën e tyre në tregun rus. “Shpresoj të jemi në gjendje që të rrisim tregtinë dhe të përmirësojmë cilësinë e bashkëpunimit në investime për të mirën e popujve tanë. Ne kemi rënë dakord tashmë me Erdoganin për të rritur tregtinë dypalëshe deri në 100 miliardë dollarë”, tha Putin në një intervistë me agjencinë turke Anadolu.

Në fakt Moska dhe Ankaraja gjatë pasdites nënshkruan një memorandum për ndërtimin e një gazsjellësi nënujor që do të transportojë 63 miliardë metër kub gaz në vit që nga Rusia. Siç shpjegoi kreu i Gazprom Alexei Miller, nga ky vëllim Turqia do të marrë 14 miliardë metër kub dhe pjesa tjetër do të transportohet përmes këtij vendi në tregje të tjera.

Gjithashtu Turqia do të kërkojë mënyra për të përmirësuar eksportet bujqësore në Rusi. Kompania shtetërore ruse, Rosatom, do të jetë përgjegjësja për ndërtimin e centralit të parë bërthamor turk që do të fillojë në 2016-ën në provincën jugore të Mersinit, me një kosto prej 22 miliardë eurosh dhe pritet të jetë në funksion në 2020-ën.