Të gjithë ata shtetas të huaj që investojnë 200 mijë dollarë e sipër në Shqipëri do të marrin shtetësinë shqiptare. Duke folur në mbledhjen e qeverisë, Berisha tha se vendimi është një praktikë e ngjashme me disa vende të Ballkanit.
“Jepet shtetësia për ata që kanë investuar 200 mijë dollarë dhe e faktojnë përmes organit tatimor. Këtë praktikë e ka Mali i Zi, Hungaria, Bullgaria. Pika gjashtë thotë që pranimi i tij të mos prekë sigurinë dhe mbrojtjen e Shqipërisë”, tha Berisha.
Duk folur për dhënien e shtetësisë për shtetasit kosovarë, Berisha tha se duhet biseduar me Kosovën për modalitetet. Ai shtoi se ligji do të hyjë në fuqi pas zgjedhjeve pas tij fshihen as ambicie elektorale dhe as territoriale.
“Së pari nuk është një çështje politike. Në fuqi do të hyjë pas zgjedhjeve. Nuk ka as edhe një përpjekje më të vogël elektorale. Shqipëria është një vend që nuk ka kurrfarë ambicie territoriale”, tha kreu i qeverisë.