Qosja: Aleanca PS-LSI, një e padëshiruar e nevojshme

Akademiku kosovar Rexhep Qosja e cilëson aleancën parazgjedhore PS-LSI një të padëshiruar të nevojshme. Në një intervistë për GSH, Qosja shprehet se fajtorë për konfliktin në gjirin e së majtës janë vetë liderët e saj, Rama, Nano dhe Meta. “Koalicioni parazgjedhor që krijuan Partia Socialiste dhe Lidhja Socialiste për Integrim, sipas mendimit tim, është një e Padëshiruar e nevojshme. Koalicioni parazgjedhor PS-LSI është një e Padëshiruar e nevojshme, unë u jap të drejtë si atyre që janë përpjekur dhe e kanë sendërtuar këtë koalicion, domethënë kryetarit Edi Rama e Kryesisë së Partisë Socialiste dhe kryetarit Ilir Meta e Kryesisë së Lidhjes Socialiste për Integrim, ashtu edhe atyre që po e kundërshtojnë këtë koalicionin, duke e mbuluar me fjalë mospajtimi dhe zhvlerësimi”.

Gjuhëtari dhe studiuesi Qosja madje e shkruan me të madhe fjalën e Padëshiruar dhe për këtë jep shpjegimin e mëposhtëm. “Kryetari i Lidhjes Socialiste për Integrim, Ilir Meta, dhe kryetarët e Partisë Socialiste Fatos Nano, në vitin 2005, kurse Edi Rama në vitin 2009 janë fajtorë për konfliktin në të majtën shqiptare, në sajë të të cilit Sali Berishës iu bë e mundshme të marrë, të përdorojë e të shpërdorojë, pushtetin politik e shtetëror në Shqipëri tani e tetë vjet. Faji i Ilir Metës është aq më i madh edhe për arsye se në vitin 2009 hyri në koalicion qeveritar me Sali Berishën dhe, deshi s’deshi, u bë bashkëpjesëmarrës në të gjitha të këqijat që prodhoi dhe në krimet që shkaktoi pushteti i drejtuar prej këtij koalicioni. Për këtë arsye mospajtimi me koalicionin e tashëm PS-LSI është çështje e parimësisë politike, në njërën anë dhe çështje e etikës intelektuale, në anën tjetër. Ndodh që në jetën politike, madje, në jetën shoqërore në përgjithësi një e padëshiruar kur e kur të quhet e nevojshme, madje, e domosdoshme. Politika është një veprimtari shumë e përbërë, bërësit e së cilës, krijuesit dhe zbatuesit e së cilës, jo rrallë shtrëngohen të zgjedhin midis të keqes më të vogël dhe të keqes më të madhe.
Koalicionin PS-LSI, në të vërtetë zgjerimin e koalicionit të majtë me LSI-në, e bëjnë të nevojshëm zgjedhjet e 23 qershorit, në të cilat vendoset për ardhmërinë e Shqipërisë”, thotë Qosja.