Qytetarët ankohen, INUK pezullon punimet në Bulevardin e Ri

Në deklaratën e shpërndarë për mediat, INUK deklaron se, ndërhyrja e tij ka ardhur për shkak të ankesave të shumta që janë bërë nga qytetarët.“Bazuar në ankesat e shumta dhe të herëpashershme të qytetarëve të Tiranës që përfshihen në zonën e ndërtimit të Bulevardit të Ri, të paraqitura në Prefekturën e Tiranës – INUK pezulloi punimet, deri në verifikimin e dokumentacionit tekniko-ligjor në të mirë të sqarimit të situatës. Ankesat e qytetarëve ndaj bashkisë së Tiranës kanë të bëjnë kryesisht me mosvlerësimin dhe për rrjedhojë moskompensimin e drejtë të pronave që do të prishen. Ankesa, që janë shprehur publikisht edhe në protestat e organizuara nga këta banorë ndaj bashkisë së Tiranës”, thuhet nw deklaratën e INUK.

***

Reagimi i Prefektit te Tiranës, Sadi Vorpsi

Referuar ankesave të qytetarëve të Tiranës, pronat e të cilëve preken nga ndërtimi i Bulevardit të Ri,  Prefektura  e Tiranës bën me dije se për një periudhë disa mujore, ajo ka marrë me qindra ankesa apo dhe ka zhvilluar takime të drejtëpërdrejta me ta, për shqetësimin lidhur me shpronësimet.

Ky problem, i cili mund të marrë përmasat e një konflikti social ngrihet në bazë të shqetësimit të pronarëve ndaj Bashkisë së Tiranës se shpronësimet nuk po realizohen në përputhje dhe sipas afateve të përcaktuara në legjislacionin përkatës.

Konkretisht, ata janë ankuar për referenca joreale në vlerësimin e pronave të tyre, krahasuar me çmimet e tregut.
Nisur nga ky shqetësim masiv në respekt të ligjit Prefektura e Tiranës i ka kërkuar INUK verifikimin e dokumentacionit tekniko-ligjor  për shembjet në fjalë.

Prefektuar është e angazhuar të zbatojë gërmë për gërmë ligjin dhe të verifikojë cdo shqetësim të ngritur nga qytetarët në lidhje me shkelje të pretenduara nga ata.