Rama 40 ditë në bazë për fushatën e “Pastrimit”!

Nga e shtuna e shkuar, Partia Socialiste është rikthyer në bazë për të rivendosur edhe një herë kontaktin direkt me elektoratin.

Pavarësisht se nuk jemi në një vit elektoral dhe për më shumë kur kanë kaluar vetëm pak muaj nga zgjedhjet e fundit lokale, kreu i socialistëve, Edi Rama ka urdhëruar të gjithë të zgjedhurit e vet dhe ministrat socialistë të kabinetit qeveritar që të hyjnë në një komunikim të drejtpërdrejtë me elektoratin e majtë me moton “Për ta pastruar më tej Shqipërinë” dhe që do të shërbejë për t’iu shpjeguar atyre punën e kryer nga qeveria deri më tani në raport me situatën në të cilën ajo e gjeti vendin.

Kreu i socialistëve ka vendosur ta drejtojë vetë këtë fushatë komunikimi intensive me bazën, dhe stacioni i parë ka qenë juglindja, ku ai qëndroi gjatë kësaj fundjave dhe zhvilloi një sërë takimesh me strukturat partiake dhe qytetarët.

Ndërkohë që paralelisht me të, edhe të gjithë ministrat, koordinatorët e PS-së në rajone dhe deputetët sipas njësive vendore kanë zhvilluar takime me strukturat partiake.

Burime nga selia rozë kanë bërë të ditur se në kuadër të këtij turi është përgatitur një kalendar i plotë aktivitetesh për çdo njësi vendore, si dhe personat që do asistojnë në to, përfshi këtu ministrat, deputetët dhe drejtuesit vendorë të partisë.

Kështu mësohet se në përgjithësi ekziston një ndarje e madhe, ku kryesisht aktivitetet në veri do i drejtojë vetë Kryeministri, ndërsa në jug numri dy i partisë, Gramoz Ruçi. Gjithsesi, të dy drejtuesit e lartë partiakë do të jenë të pranishëm më shumë vetëm në takimet më të rëndësishme, të cilat në shumicën e rasteve do të tentohen të jenë dhe mediatike.

Ndërkohë që është përcaktuar që në të gjitha takimet e tjera, në çdo njësi do jetë i pranishëm një ministër i caktuar, sipas problematikës rajonale, deputeti i zonës dhe drejtuesi i partisë bashkisë përkatëse.

Ky tur komunikimi është vendosur të bëhet i ndarë nga pjesa tjetër e mazhorancës, pra nga ministrat dhe deputetët e LSI-së, pasi është konsideruar si një zhvillim i brendshëm partiak dhe jo qeveritar.

Natyrisht, ky veçim ka të bëjë edhe me një fakt tjetër, me shmangien e përplasjeve mes mbështetësve të dy partive kryesore.

Burime pranë selisë rozë kanë bërë të ditur për “Mapo” se në bazë ekziston një pakënaqësi e vazhdueshme sa i përket punësimeve.

Fushata e komunikimit me bazën vjen edhe si një fazë para mbajtjes së Kongresit elektoral që do të mbahet në janar dhe nëpërmjet së cilës kërkohet që të motivohen strukturat partiake për t’u bërë pjesë e procesit të riorganizimit deri në Kongres.

Natyrisht, është vendosur që çdo takim të shoqërohet në fund edhe me një proces të shpërndarjes së teserave për anëtarësimet e reja në parti.

E gjithë kjo fazë komunikimi me bazën është parashikuar që të zgjasë deri në 15 dhjetor dhe më pas, faza deri në Kongres do të shërbejë për koordinimet e fundit të të gjitha rezultateve që do konkludohen në Kongresin e janarit.