Rama, fjalim prekës për nënën dhe bashkëshorten

Partia Socialiste ka organizuar sot një aktivitet me rastin e Ditës së Nënës. Kreu i PS-së ka mbajtur një fjalim prekës, përmes të cilit vlerësoi dhe falënderoi nënën e tij për mbështetjen në vite. Rama tha se nëna ka qenë për të pikë referimi gjatë gjithë jetës, ndërsa e ftoi atë së bashku me bashkëshorten, Linda, për një fjalim të shkurtër spontan.

“I konsideroj një privilegj që i njoh dhe punoj me to. Ne nuk jetojmë në një botë perfekte, por në një botë që duhet ta përmirësojmë dita-ditës dhe në përpjekjen tonë, në rrugëtimin tonë ne gjejmë përballë edhe ngjarje të një brutaliteti dhe shpërfilljeje të pashoqe, që prekin nëna, që prekin gra, vajza. Por megjithatë këto mbetem raste që nuk përbëjnë rregull. Rregulli është po ai: pa nënat ne nuk do të ishim as këtu ku jemi, as ata që jemi. Mësimi nga nënat tona është forma më e lartë e mësimmarrjes që tejkalon çdo shkollë, çdo universitet, çdo eksperiencë jete, ashtu sikundër falja e nënave tona për ne në momentet kur gabojmë apo harrojmë mësimet e tyre është forma më e lartë e faljes në këtë pjesë të jetës tokësore që na ka rënë të kalojmë falë atyre që na kanë sjellë në jetë. Ndoshta e rëndova pak gjendjen e përgjithshme të alegrisë që ndodhet këtu, por moment më të mirë dhe ditë më të duhur për të thënë fjalët e gjetura në thellësinë më të madhe të zemrës nuk kishte. Por e mbyll duke falënderuar gjitha ju nëna që jeni këtu bashkë me ne dhe përmes këtij falënderimi dhe të gjitha nënat që na dëgjojnë, gjyshet dhe nënat gra, shoqe të jetës, që na e lehtësojnë udhëtimin tonë në këtë botë. Shpresoj që pa mundur kurrë ndoshta të arrijmë në lartësinë e atyre vlerave që ju i mishëroni, të mundohemi çdo ditë  të përpiqemi drejt asaj lartësie, pa ju trembur perfeksionit që nënën time e ka bërë që shpesh herë të jetë e ashpër dhe shpesh të mos harrojë se perfeksioni nuk i takon kësaj bota dhe kështu të jetë edhe e ndjeshme, në atë masë që di të jetë vetëm një nënë për të falur gabimet e djalit të saj. Pa dashur të të kërkoj të mbash fjalim, do të doja që në këtë ditë kaq të madhe të ma shkulësh pak veshin.

Aneta Rama: Unë e di që kam qenë gjithnjë një pikë referimi për ty, por e thënë publikisht më ke emocionuar shumë.

 Edi Rama: Unë e dua shumë jetën dhe nuk resht asnjë herë së kërkuari prej saj, do të doja të plotësoja pjesën tjetër për t’u ndier plotësisht i lumtur mes dy grave të jetës time.

Linda Rama: Ju të PS-së kështu bëni, ta jepni fjalën edhe kur nuk je e përgatitur. Mora kaq emocion kur u ballafaqova me kaq shumë gra me flokë të bardha, që nuk e dinin se ç’ishte politika deri në momentin kur fëmijët e tyre futen në politikë. Këtu kam parasysh edhe nënën time, që i është dashur në tre vitet e fundit të mësojë se ç’është politika dhe natyra e saj e brishtë më ka bërë të mendoj se nuk do ta përballonte dot, me një figurë kaq … me një dhëndër kaq të mirë dhe personalitet publik me peshë në jetën e vendit. Më ka befasuar nëna ime, sepse në momentin që ka pasur një problem për shkak të shpifjeve dhe sharjeve, në asnjë moment nuk kam parë merakun për veten e saj. Ajo më ka thënë: Bëju Edit mbështetje.