Rama: Ditë e bukur dhe e qetë! Nga ky proces duhet të dalë e fituar Shqipëria dhe jo vetëm partia që do të vazhdojë të qeverisë vendin

Kryeministri Edi Rama ka bërë daljen e parë publike që kur votoi sot paradite. Në një konferencë për shtyp ai nuk pajtohet me exit-poll-et para numërimit të votave por thotë të pritet rezultati real.

“Për herë të parë në Shqipëri zhvillohen exit-polle dhe dua t’i falenderoj të gjithë ata që u angazhuan për këtë eksperiencë në Shqipëri dhe dua njëkohësisht t’u them të gjithëve në radhë të parë socialistëve se votat janë në kuti, populli ka folur, tani duhet të dëgjojmë popullin dhe detyra e çdo numëruesi dhe vëzhguesi është që me përgjegjësinë më të lartë qytetare e ligjore të kontribuojë në numërimin korrekt të votave në kuti.

Hamendjet, sondazhet, exitpoll-et pavarësisht faktit që ne na japin forcë qeverisëse i përkasin parashikimeve para ndeshjes. Tani është rezultati i kutive, që është rezultati i ndeshjes.

Përqëndrohuni në detyrën tuaj dhe njëkohësisht e përsëris atë që tha Bora edhe në emrin tim, një falenderim nga zemra për të gjithë patronazhistët në gjithë Shqipërinë që kanë bërë një punë mbresëlënëse,” tha Rama.

“Tani është momenti që qytetarët të ndjekin nga shtëpia vazhdimin e këtij procesi. Nesër dielli do të lind përsëri, Shqipëria do të buzëqesh. Ajo që dua patjetër të theksoj nuk është e fundit për nga rëndësia, përkundrazi është se ne nuk duam thjesht rezultatin dhe konfirmimin si forcë qeverisjes, por duam që siç ishte kjo ditë kaq e bukur, kaq e qetë, kaq qytetare, falë mirësjelljes demokratike të të gjithëve, duhet të jetë edhe vazhdimi i këtij procesi. Nga ky proces duhet të dalë e fituar Shqipëria dhe jo vetëm partia që do të vazhdojë të qeverisë vendin”, vijoi ai.

o.j/dita