Rama flet për operacionin më të rëndësishëm të këtij mandati: Luftë frontale kundër informalitetit

Pa luftën kundër informalitetit nuk ka shtet, nuk ka mirëqënie, nuk ka shpresë.Shumë ekipe qeverisëse, psh Sarkozi, e nisën me uljen e rrogave të veta.Pse na duhen 140 deputetë dhe jo 80?A mund të jepet kjo përgjigje?Po ta krahasojmë sipas numrit të popullsisë, Italia, me këtë koefiçientin tonë, i bie të ketë 2500 deputetë dhe Kinës i bie të ketë një asamble me 60 mijë deputetë!
Po hallka të pafund drejtorishë ndërqeveritare, nëpunësish që “vrasin miza” në pushtetin qendror e vendor, dublime funksionesh e punësh, ushtarakë të tepërt etj?Është e vërtetë që duhet një fond konsumi, por këto lekë le të hidhen për përkrahje sociale, rritje pensionesh e pagash, punë publike etj.
Kryeministri thotë se duhet ta ulim informalitetin në kufinjtë e lejueshëm.Synimi duhet të jetë që të mos ketë fare informalitet, zoti Rama.
Sa për luftën kundër informalitetit, duhet një betejë e vërtetë, ose, siç thuhej në komunizëm, “qilizëm”.Nuk ka pse t’i vijë kujt keq pse i merren taksa (na falni për shembullin), Sadri Abazit apo Paulin Sterkajt dhe “Kastratit” e Samir Lames, apo atyre që fitojnë miliona dhe dalin e bëjnë karshi duke i prishur paratë për luks nëpër botë.(Dihet se si përfundon paraja e vjedhur, haram).Ata që mbrojnë hajdutët ose janë vetë hajdutë, ose kërkojnë rrumpallë në këtë vend.(Rompo di pale!)
Por pa ligj, nuk bëhet asgjë.Një ligj i mirëmenduar, i fortë, gjithpërfshirës duhet të hartohet e miratohet, mundësisht nga të gjithë.Jo vetëm i vogëli të vihet para ligjit psh.kasapi dhe shitësi i peshkut, por edhe i madhi, prodhuesi i kromit dhe i çimentos.Jo vetëm nëpunësi i thjeshtë, por edhe kryetari i bashkisë dhe ministri.
Po nuk u kryen dhe zbatuan reforma të thella për taksat, ujin, mjedisin apo për vetë standartin e jetës, jo më nuk kemi shpresë të jetojmë këtu, por do hidhemi nëpër male e dete më keq se më 1991.
A nuk është turp që, edhe pse u trumbetua fikja e furrave të gëqeres që ndizeshin me goma të hedhura, ata vazhdojnë të qelbin zonën e Krujës?!!!A nuk është turp që priten e shfarosen pyjet, që ndotet Elbasani?Si ka mundësi që nuk i bie mendja dikujt që të detyrojë me ligj fshatarët të mos hedhin haletë nëpër përrenj e vija uji?Dikur vinte ndihmësmjeku e mjeku i fshatit shtëpi më shtëpi dhe kontrollonte në se e ke mbuluar gropën e h…s.Sot, kur mundësitë janë shumë më të mëdha, shtëpitë në fshat, shpesh një këtu e një atje, nuk kanë gropa fare, por me tuba plastike që kushtojnë edhe lirë, hedhin fekalet ku të munden, sepse kërkush nuk u kërkon llogari.Ku është Ministria e Mjedisit dhe e Shëndetësisë?
Shqipëria është bërë një kungull, që nuk din nga ta kapësh, sepse nuk ka bisht.
Nxirrni ligje dhe i zbatoni, o shtetarë!